पुणे– गेल्या १० ऑक्टोबर २२ रोजी झालेल्या किरण शेंडकर खुनाच्या प्रकरणी त्याच्या ३ मित्रांना भारती विद्यापीठ पोलिसांनी अटक केली आहे. या तीन मित्रांनी मिळून एका मित्रास कात्रज परिसरातील जांभुळवाडी दरी पुलावरुन खाली फेकुन देत त्याचा निघृण खून केल्याचा प्रकार घडला हाेता. याप्रकरणी अडीच महिन्यानंतर पोलिसांनी एका सराईत गुन्हेगारासह तीन आराेपींना अटक केल्याची माहिती शनिवारी दिली आहे.
किरण राेहिदास शेंडकर (वय-24) असे खून झालेल्या तरुणाचे नाव आहे. याप्रकरणी त्याचे आंबेगाव पठार येथे भाड्याने राहणारे मित्र आदेश सुभाष मगरे (23), याेगेश गाेकुळ सपकाळे (28) व विशाल विष्णु कांबळे (25,रा.पुणे) या आराेपींना पोलिसांनी अटक केली आहे.
पोलिसांनी दिलेल्या माहितीनुसार, याबाबत मृत किरण शेंडकर याचे वडील राेहिदास चंद्रकांत शेंडकर (50,रा.कात्रज,पुणे) यांनी भारती विद्यापीठ पोलिस ठाण्यात आराेपी विराेधात फिर्याद दाखल केली आहे. त्यानुसार पोलिसांनी आराेपींवर खुनाचा गुन्हा दाखल केला आहे. ही घटना 10 ऑक्टाेर 2022 राेजी रात्री सात ते साडेसाठ वाजण्याच्या दरम्यान घडलेली होती.
सदर मृत किरण शेंडकर यास त्याचे तीन मित्र घटनेच्या दिवशी जांभुळवाडी दरी पूल याठिकाणी घेऊन गेले हाेते. त्याठिकाणी अज्ञात कारणासाठी कशाने तरी त्यांच्यात मारहाण हाेऊन त्यांनी किरणला जखमी करुन जीवे ठार मारुन त्यास जांभुळवाडी दरी पुलाखाली ढकलले म्हणून गुन्हा दाखल करण्यात आला आहे. मृताचे शवविच्छेदन केल्यानंतर ससुन रुग्णालयाने त्याचा खून झालेल्याचा अहवाल दिला.तसेच डाॅक्टरांचे अभिप्रायनुसार त्यास मारहाण झाल्याचे स्पष्ट झाले आहे. याबाबत पुढील तपास पोलिस उपनिरीक्षक अंकुश कर्चे करत आहे. दरम्यान, आरोपीस आज शिवाजीनगर न्यायालयात हजर केले जाणार असल्याची माहिती पोलिसांनी दिली आहे. नेमके कोणत्या कारणास्तव आरोपींनी मित्राचा खून केला याचा उलगडा झालेला नाही.