श्रीमंत दगडूशेठ हलवाई सार्वजनिक गणपती ट्रस्टतर्फे आयोजन ; वेदमूर्ती नटराजशास्त्री यांनी केले पौरोहित्य
पुणे : श्रीमंत दगडूशेठ हलवाई सार्वजनिक गणपती ट्रस्ट तर्फे मंदिरामध्ये ब्रह्मवृंदांच्या उपस्थितीत दहा दिवसीय अतिरुद्र याग आयोजित करण्यात आला होता. जगाच्या कल्याणाकरीता आणि आरोग्यसंपन्न समाजाकरीता अतिरुद्र याग मंदिरात करण्यात आला. दहा दिवस दररोज दुपारी ब्रह्मवृंदांच्या उपस्थितीत हे धार्मिक विधी पार पडले.
अतिरुद्र यागाची पूर्णाहुती मंगळवारी पार पडली. यावेळी ट्रस्टचे सुनील रासने, महेश सूर्यवंशी उपस्थित होते. वेदमूर्ती नटराजशास्त्री आणि ब्रह्मवृंदांनी होम, विधी केले. महासंकल्प, महान्यास, रुद्र त्रिशदी अर्चना, गणेश सहस्त्रनाम अर्चना, रुद्रजप असे धार्मिक विधी करण्यात आले. यामध्ये १ लाख ३० हजार रुद्रजप, १७ लाख गणेश अर्चना, १७ हजार अथर्वशिर्ष आवर्तने, ३ हजार ५०० त्रिशदी अर्चना तसेच दररोज होमहवन करण्यात आले.
श्री गणेश, श्री सूर्यदेवता, भगवान शंकर, दुर्गा माता, महा विष्णू, मेधा दक्षिणा मूर्ती होम, महालक्ष्मी, नवग्रह, वास्तु देवता -अष्टदिशा आणि त्यानंतर पूर्णाहुती झाली. सभामंडपामध्ये भव्य होमकुंड साकारुन हे अतिरुद्र होम दररोज करण्यात आले. मंदिरामध्ये विविध धार्मिक कार्यक्रमांद्वारे आरोग्यसंपन्न समाजाकरीता प्रार्थना करण्यात येत आहे. त्यातील अतिरुद्र होम हा या धार्मिक विधींतील सर्वोच्च बिंदू ठरला. गंगा, यमुना, इंद्रायणी, पंचगंगा, मुठा, अष्टविनायक येथील नद्या, ज्योर्तिलिंग नद्या, रामेश्वरम २१ कुंडांचे जल याकाळात वापरले गेले. तसेच २१ आयुर्वेदिक औषधी वापर होम-हवनाच्या वेळी करण्यात आले. सर्व नद्यांचे एकत्रित केलेल्या मंत्रोच्चारीत पाण्याचा श्रींना जलाभिषेक करण्यात आला.