पुणे- राष्ट्रवादी काँग्रेसचे अध्यक्ष शरद पवार यांची अजून एक पिठी राजकारणात आपली पाय जमवण्यास तयार झाली आहे. पवारांचे नातू रोहित पवार विधानसभा निवडणुकीच्या रिंगणात उतरण्यास सज्ज झाले आहेत. स्वत: रोहित पवार यांनी यासंदर्भात माहिती दिली. आपण विधानसभा लढण्यासाठी इच्छुक असून, अद्याप मतदारसंघ ठरला नाही, असे रोहित पवार यांनी म्हटले आहे.
पुण्यात पत्रकारांशी बोलताना रोहित पवार याबाबत म्हणाले, लोकांशी चर्चा केल्यानंतर लक्षात येते की गेले 12 वर्ष मी व्यावसाय करताना सामान्य नागरिकांशी माझी नाळ जोडली गेलेली आहे. काम करताना माझा सामाजाचा अभ्यासही चांगला झालेला आहे. त्यामुळे विधानसभा लढण्याचा माझा विचार आहे. मी कुठून लढणार याचा निर्णय पक्षाचे नेते चर्चा करून त्याचा निर्णय घेतील. हा निर्णय मला मान्य असेल. मी पवार साहेबांच्या विचाराने काम करतो, त्यामुळे जामखेड भागातून आपल्याच विचाराचा आमदार निवडून आला पाहिजे. या भागातील शेती, महिला, तरुणांचे प्रश्न या भागातून निवडून येणारा आमदार निश्चीत सोडवेल.
नियोजन न केल्याने पाण्याचा प्रश्न
पाण्यावरून शहरी आणि ग्रामीण असा वाद नाही. सध्याच्या सरकारमधील पालकमंत्री, पाटबंधारे विभागाचे अधिकारी यांनी व्यवस्थित नियोजन न केल्याने पाणी कमी पडत आहे. व्यवस्थित नियोजन असते तर ही स्थिती निर्माण झाली नसती. पाणी वापराबाबत प्रबोधन केले तर पुणेकर आणखी योग्य प्रकारे पाणी वापरतील असेही पवार यांनी सांगितले.
पाच वर्षात पार्थ काय बदल करतील याचा विचार करा
मावळ लोकसभा मतदारसंघातील राष्ट्रवादीचे उमेदवार पार्थ पवार यांना मार्गदर्शन केले नाही का? असे विचारले असता पवार म्हणाले, पार्थ यांना 22 लाख मतदारांपर्यंत पोहोचायचे होते आणि मी वेगवेगळ्या तालुक्यांमध्ये फिरत होतो. आमची चर्चा नक्कीच होत असते, एकमेकांचे विषय समजून घेत असतो. पार्थ चांगल्या मतांनी निवडून येतील. सुरूवातीला पार्थ यांना काही लोकांनी ट्रोल केले, पण त्यांचे सुरूवातीचे भाषण आणि शेवटचे भाषण यात फरक आहे. या 20 दिवसात त्यांच्यात बदल केला. तर पाच वर्षात पार्थ या परिसराचा काय बदल करतील याचा तुम्ही विचार करा असेही पवार म्हणाले.
- रोहित पवार हे सध्या पुणे जिल्हा परिषदेत राष्ट्रवादीकडून बारामतीचे प्रतिनिधित्व करतात. पवार कुटुंबातील असल्याने मोठे राजकीय वलय त्यांना आहे. पण, रोहित पवार कुठल्या मतदारसंघातून विधानसभेच्या रिंगणात उतरणार, याची माहिती नसल्याने, राजकीय वर्तुळात खळबळं उडाली आहे.
कोण आहेत रोहित पवार?
रोहित पवार हे राजेंद्र पवार यांचे सुपुत्र आहेत. राजेंद्र पवार म्हणजे राष्ट्रवादीचे नेते अजित पवार यांचे चुलत बंधू. राजेंद्र पवार यांचे वडील पद्मश्री आप्पासाहेब पवार हे देशाचे माजी केंद्रीय कृषिमंत्री शरद पवार यांचे बंधू. राजकारणात रोहित पवार यांची ओळख शरद पवारांच्या नावाने होणे सहाजिक आहे. मात्र, पवारांच्या नावासोबत येणारी भलीमोठी जाबाबदारीही पेलण्याची ताकद रोहित पवारांमध्ये आहे. शरद पवारांकडे जे शेतीविषयक अफाट ज्ञान आहे, त्याची चुणूक रोहित पवारांमध्ये दिसून येते.
वडिलांसोबत सुरुवातीला व्यवसायात उतरलेल्या रोहित यांनी पुढे आजोबा आणि काकाच्या पावलावर पाऊल टाकत, राजकारणात उतरण्याचा निर्णय घेतला. पुणे जिल्हा परिषदेच्या निवडणुकीत शिरसुफळ गणातून रोहित पवारांनी राष्ट्रवादी काँग्रेसकडून निवडणूक लढलवी आणि राज्यात दुसऱ्या, तर पुणे जिल्ह्यात पहिल्या क्रमांकाच्या विक्रमी मताधिक्क्यांनी ते निवडून आले. राजकारणातील त्यांचा प्रवेशही मोठ्या दिमाखात झाला. सध्या जिल्हा परिषद सदस्य म्हणून विविध कामांचा धडाका त्यांनी सुरु केला आहे. या कामांची सोशल मीडियासह अनेक ठिकाणी चर्चा सुरु असते.
रोहित पवार सध्या भूषवत असलेली पदे
-मुख्य कार्यकारी अधिकारी, बारामती अॅग्रो लिमिटेड
– अध्यक्ष, इंडियन शुगर मिल्स असोसिएशन
-उपाध्यक्ष, वेस्ट इंडियन शुगर मिल्स असोसिएशन
– संचालक, आयएसईसी
– नियमक मंडळ सदस्य, वसंतदादा शुगर इन्स्टिट्युट
– कार्यकारी सल्लागार समिती सदस्य, इंडियन पोल्ट्री इक्विपमेंट मॅन्युफॅक्चरिंग असोसिएशन ऑफ इंडिया