प्रदर्शनापूर्वीच तपासा – संदीप खर्डेकरांची महिला आयोगाला विनंती
पुणे- मराठी चित्रपट ‘ नाय वरन भात लो न्चा ,कोण नाय कोन्चा’ प्रदर्शित होत असताना त्याचा ट्रेलर पाहून भाजपाचे शहर प्रवक्ते आणि क्रिएटिव्ह फाउंडेशनचे अध्यक्ष संदीप खर्डेकर यांनी याबाबत तीव्र आक्षेप नोंदवून स्त्री अवहेलनेचा तर प्रयत्न यातून होत नाही ना ? असा सवाल करत राज्य महिला आयोगाच्या अध्यक्षा रुपाली चाकणकर यांना पत्र लिहून याबाबत प्रदर्शनापूर्वीच खबरदारी घ्यावी अशी विनंती केली आहे. . नेमके खर्डेकर यांनी या पत्रात काय म्हटले आहे , ते वाचण्यासाठी हे पत्रच आम्ही जसेच्या तसे इथे देत आहोत .
मा. रुपालीताई चाकणकर,
अध्यक्ष,महाराष्ट्र राज्य महिला आयोग,
गृहनिर्माण भवन, गांधी नगर, बांद्रा ईस्ट, मुंबई, महाराष्ट्र.
विषय – नाय वरन भात लो न्चा ,कोण नाय कोन्चा ह्या चित्रपटाबाबत.
मा. महोदया,
काल whatsapp वर नाय वरन भात लो न्चा ,कोण नाय कोन्चा ह्या महेश मांजरेकर दिग्दर्शित चित्रपटाचा ट्रेलर एकाने फॉरवर्ड केला आणि तो बघून अंतरबाह्य हादरलो. अभिव्यक्ती स्वातंत्र्याच्या नावाखाली किंवा जळजळीत सत्य दाखवण्याच्या नादात स्त्रियांची अवहेलना केल्याचे सकृतदर्शनी ट्रेलर वरून दिसत आहे. चित्रपट परीक्षण मंडळाने एवढ्या आई बहिणीवरील शिव्यांनी भरलेल्या चित्रपटाला मान्यता दिली कशी हा प्रश्न आहेच पण त्यासोबतच लहान मुलांना केवळ हिंस्त्र दाखविले आहे असे नाही तर यात लहान मुलाने स्त्रीचे पाय / मांड्या दाबणे व तिने त्याला विकृतरित्या छातीशी कवटाळणे हे सगळेच वेदनादायक आणि संतापजनक आहे.तरी आपण प्रदर्शनपूर्व चित्रपट बघावा व आपणास ही गैर वाटल्यास ह्यातील या प्रसंगांवर आक्षेप नोंदवावा व कात्री लावण्यास किंवा चित्रपटाचे प्रदर्शन रोखण्यास सेन्सर बोर्डास बाध्य करावे अशी आग्रही मागणी करत आहे.
आपला,
संदीप खर्डेकर.
अध्यक्ष, क्रिएटिव्ह फाउंडेशन.