साने डेअरी चौक मित्र परिवार यांच्यावतीने सफाई कर्मचाऱ्यांचा सन्मान
पुणे : स्वच्छ भारत अभियानात देशभरात पुणे शहराने पाचव्या क्रमांकावर झेप घेतली आहे. स्वच्छ सर्वेक्षण राष्ट्रीय पुरस्कारात पुणे महानगरपालिकेला सन्मानित करण्यात आले. यामध्ये स्वच्छता कर्मचाऱ्यांचा मोलाचा वाटा आहे. सफाई कर्मचारी हे समाजातील एक महत्त्वाचा घटक आहेत.त्यामुळे सफाई कर्मचाऱ्यांचा यथोचित सन्मान व्हायला हवा. असे मत आमदार सिद्धार्थ शिरोळे यांनी व्यक्त केले.
साने डेअरी चौक मित्र परिवार आणि सुनील पांडे (लोहगांवकर) यांच्या संयुक्त विद्यमाने सफाई कर्मचाऱ्यांच्या सन्मान सोहळ्याचे आयोजन करण्यात आले होते. यावेळी नगरसेविका ज्योत्स्ना एकबोटे, ॲड अभय आपटे, आरोग्य अधिकारी किरण मांडेकर, अभिजित मोडक, समीर हाळंदे तसेच साने डेअरी चौक मित्र परिवाराचे सर्व सभासद व सफाई कर्मचारी उपस्थित होते.
सिद्धार्थ शिरोळे म्हणाले, सफाई कर्मचाऱ्यांशिवाय आपला परिसर स्वच्छ राहणे अशक्य आहे. स्वच्छ पुणे सुंदर पुणे या संकल्पनेत त्यांचा मोलाचा वाटा आहे. त्यांची एक दिवसाच्या अनुपस्थितीचे परिणाम देखील लगेच दिसून येतात. त्यामुळे साने डेअरी चौक मित्र परिवाराच्या वतीने त्यांचा झालेला सन्मान कौतुकास्पद आहे. सुनील पांडे यांचा सामाजिक कार्यात नेहमीच मोठा वाटा असतो. त्यांच्यामार्गदर्शनातून सातत्याने समाजहिताचे उपक्रम राबविले जातात. गरजू नागरिकांना मोफत रुग्णवाहिका, कोरोना काळात नागरिकांना केलेली मदत, कोविड लसीकरण हे त्यांचे उल्लेखनीय आहे.
सुनील पांडे म्हणाले, कोरोनाच्या काळात सफाई कर्मचारी यांनी कायम पुढे राहून आपला परिसर स्वच्छ ठेवला त्यांचे हे कार्य सन्मानास पात्रच आहे. रोजच्या जिवनात देखील आपण सुजाण नागरिक या नात्याने आपापला परिसर स्वच्छ ठेवून त्यांना मदत केली पाहिजे.