डॉक्टर मनपात सेवेला यायला तयार आहेत पण पुणे मनपा नियुक्ती देत नाही!
१७७ पैकी केवळ ८१ पदे भरली तर ९६ रिक्त..
अनेक प्रवर्गाच्या प्रारुप याद्या जाहीर होऊन ८ महिने ते दीड वर्ष झाले पण अजून नियुक्त्या नाहीत!
कोरोनाशी अशी लढणार का पुणे महानगरपालिका?
पुणे -महानगरपालिकेच्या आरोग्य विभागाच्या कायम आस्थापनेवरील विविध संवर्गातील डाॅक्टरांच्या रिक्त पदभरती प्रक्रियेस केवळ भ्रष्टाचार आणि वशिलेबाजीमुळे विलंब होत असून नियुक्त्या कोणाला द्यायच्या याद्या तयार करूनही दीड वर्षे प्रत्यक्षात नियुक्त्या दिल्या नाहीत
यामागे भार्ष्टाचार हेच कारण दडलेले आहे असा आरोप करत किमान कोरोनाची तिसरी लाट आलेली असताना तरी …जनाची नाही तर मनाची बाळगा … लोकांना मास्क लावा सांगणारे अनेक बंधने लादणाऱ्यांंचा हा कारभार म्हणजे ‘लोका सांगे ब्रम्हज्ञान … असाच असल्याचा आरोप आज आप चे प्रवक्ते डॉ. अभिजित मोरे यांनी केला आहे.
आज त्यांनी महापौर आणि महापालिका आयुक्तांसह अनेकांना याबाबत निवेदने दिली ते म्हणाले ,’कोरोनाची तिसरी लाट सुरु झाली असून त्यादृष्टीने प्रशासन तयारी करत आहे तसेच शिवाजीनगर येथील पीपीपी तत्त्वावरील जम्बो कोविड हॉस्पिटल पुन्हा सुरु करणार असल्याचे काल वृत्तपत्रातून समजले. पण पुणे मनपाची आरोग्य व्यवस्था बळकट करण्यासाठी महत्वाची असलेली डॉक्टर भरती मात्र गेली दीड वर्षे रखडली आहे.कोविड साथीच्या आपत्तीचा इष्टापत्ती म्हणून करुन आरोग्य व्यवस्था बळकट करण्याची संधी होती. पण दुर्दैवाने याबाबत फारसे काही केले गेले नाही. वर्ष 2020 च्या सुरुवातीलाच आम आदमी पक्षाने पुणे मनपाच्या आरोग्य विभागातील सर्व रिक्त पदे तातडीने भरण्याची मागणी केली होती तसेच जम्बो कोविड हॉस्पिटल उभारण्याच्या अगोदर सध्या पुरेशा वापरात नसलेल्या पुणे मनपाच्या अनेक रुग्णालयांच्या इमारतीचा, साधनसामुग्रीचा दर्जा वाढवून ती रुग्णालये प्राधान्याने वापरात आणण्याचा आग्रह धरला होता. यामध्ये बिंदू माधव ठाकरे रुग्णालय, राजीव गांधी रुग्णालय, बाळासाहेब ठाकरे रुग्णालय, वीरमाता जिजाऊ रुग्णालय, गाडीखाना दवाखान्याची जुनी इमारत, कर्णे दवाखाना यासारख्या अनेक ठिकाणच्या रुग्णालयांचा समावेश आहे. तसेच कमला नेहरु हॉस्पिटलमध्ये अनेक वर्षे बंद असलेला मेडिकल आयसीयू अद्यापही सुरु नाही. याबाबत कोविड लाटेत देखील आम आदमी पक्षाने आंदोलने केली होती. पण याबाबत पुणे महानगरपालिका उदासीन दिसून येते. खाजगीकरण, पीपीपी तत्त्वावर रुग्णालय चालवायला देणे, खाजगी हॉस्पिटलची बिले भरणे, त्यात प्रचंड मोठा भ्रष्टाचार करणे, टक्केवारीचे राजकारण, डॉक्टर भरती करण्याअगोदरच केवळ बिल्डिंग बांधणे आणि उपकरणे खरेदी करणे यामध्येच महानगरपालिकेतील सत्ताधारी भारतीय जनता पक्षाला रस आहे.
पुणे महानगरपालिकेची डॉक्टर भरती देखील अशाच भ्रष्ट कारभाराच्या जंजाळामध्ये अडकली आहे. डॉक्टर भरती करून आरोग्य व्यवस्था सुधारणे ऐवजी वशिल्याचे लोक या भरतीमध्ये कसे घुसवता येतील आणि त्यासाठी चालू असलेली भरती प्रक्रिया प्रचंड काळ लांबवत ठेवून योग्य उमेदवारांना कसे डावलता येईल याचं कुटील राजकारण पुणे महानगरपालिकेच्या आरोग्य विभागामध्ये चालू आहे. एका बाजूला पुणे महानगरपालिका दावा करते की आम्हाला हवे असलेले पात्र डॉक्टर भेटत नाहीत आणि दुसऱ्या बाजूला पात्र व्यक्तींनी अर्ज करून देखील त्यांची भरती दीड ते दोन वर्षे केली जात नाही.
पुणे महापालिकेमार्फत आरोग्य विभागात वर्ग 1 च्या 120 व वर्ग 2 च्या 57 अशा एकूण 32 संवर्गाच्या 177 डाॅक्टरांची/वैद्यकीय अधिकारी पदांची कायम आस्थापनेवरील सरळसेवा भरतीची जाहीरात दि 17 एप्रिल 2020 रोजी प्रसिद्ध झाली होती. सदर पदांकरीता अर्ज केलेल्या सर्व उमेदवारांना सन 2020 च्या मे महिन्यात कागदपत्रांच्या छाननीकरीता उमेदवारांना बोलावण्यात आलेले होते . तदनंतर सदर पदांच्या प्रारूप यादी जुलै 2020 मधे प्रसिद्ध करण्यात आलेल्या होत्या.सदर प्रारूप यादीवर काही हरकती असल्यास 2 दिवसांत आॅनलाईन हरकती मागविण्यात आलेल्या होत्या. परंतु, जाहिरातीतील 177 पदांपैकी फक्त 81 उमेदवारांना पदस्थापना मिळालेली आहे, अजूनही 96 पदांची भरती प्रक्रिया पूर्ण झालेली नाही. यातील 3 संवर्गाच्या म्हणजेच दंतशल्यचिकित्सक – (6 पदे), भौतिकोपचार तज्ञ- (9 पदे), आयुर्वेद वैद्यकीय अधिकारी (9 पदे) एकूण 24 पदांच्या प्रारुप यादी बनवून देखील गेली दीड वर्षे अंतिम निवड यादी जाहीर करण्यात आलेली नाही. मागील दीड वर्षापासून निवड प्रक्रिया का पूर्ण झालेली नाही? योग्य पात्रता असलेले डॉक्टर पुणे मनपात सेवा देण्यासाठी तयार असताना, छाननीमध्ये ते पात्र होऊन प्रारुप यादी प्रसिद्ध होऊन दीड वर्षे होऊन देखील अंतिम यादी का जाहीर केली जात नाही? यासाठी कर्मचारी निवड समितीची बैठक मागील दीड वर्षापासून का झालेली नाही? भ्रष्टाचार, आर्थिक देवाणघेवाण करण्यासाठी आणि राजकीय लागेबांधे असणाऱ्या उमेदवारांना घेण्यासाठीच ही प्रक्रिया मुद्दाम रखडवली गेली आहे.
कोरोना सारख्या गंभीर संकटात सार्वजनिक आरोग्य व्यवस्था मजबूत होण्याची गरज प्रकर्षाने अधोरेखित झालेली आहे. तसेच सध्या ओमायक्राॅनच्या रूपात तिसऱ्या लाटेच्या पार्श्वभूमीवर ही आरोग्य विभागाच्या अत्यावश्यक सेवेतील पदभरती लवकरात लवकर होणे गरजेचे आहे. आरोग्य विभागाच्या रिक्त पदांची भरती प्रक्रिया हा महत्त्वाचा विषय आहे. त्यामुळे सदर रखडलेल्या या डाॅक्टरांच्या पदभरती बाबत आपण लक्ष घालून, योग्य ती कार्यवाही करावी व भरती प्रक्रिया लवकरात लवकर पूर्ण करावी.अशी मागणी आप च्या वतीने विजय कुंभार आणि दो. अभिजित मोरे आणि पदाधिकाऱ्यांनी या निवेदनाद्वारे केली आहे.