पुणे-संत ज्ञानेश्वर आणि संत तुकाराम यांच्या पालख्यांचे आज शुक्रवार दि. 28 जून रोजी पहाटे पुण्याहून प्रयाण झाले. यावेळी पुलगेट येथे मायनॉरिटी एज्युकेशन अॅन्ड सोशिअल ट्रस्टतर्फे इकॉलॉजिक वर्ष 2019 पर्यावरण संतुलन वर्ष निमित्त वारकर्यांना तुळशी रोपांचे वाटप करण्यात आले. पुण्याचे बिशप थॉमस डाबरे यांच्या हस्ते वारकर्यांना तुळशी रोपाचे वाटप करण्यात आले. याचे आयोजन संस्थेचे अध्यक्ष एडविन रॉबर्टस् यांनी केले. या प्रसंगी प्रशांत केदारी क्रिस्ती, विनोद सोलंकी, जॅकलिन फॉरेस्टर, आनंद सराफ, नोयला कांबळी, नरेश मुदलियार, फ्रँकी मेन्डोंजा, बेंजामिन डिसूजा, पिटर डिसूजा आदी उपस्थित होते.
याप्रसंगी बिशप डाबरे म्हणाले की, संत ज्ञानेश्वर आणि संत तुकाराम यांनी जगाला मानवतेचा संदेश दिला. तसेच पर्यावरण संवर्धनाचाही संदेश दिला. आज ग्लोबल वॉर्मिंगच्या दुष्ट चक्रात अडकलेल्या जगाला या संताचे विचारच मार्ग दाखवतील आणि त्याचे प्रतीक म्हणून भक्तीभावाने वारी करणार्या वारकर्यांना तुळशीचे रोप आम्ही श्रद्धापूर्वक दिले आहे.
संस्थेचे अध्यक्ष एडविन रॉबर्टस यांनी स्वागत केले. लतिफ मगदूम यांनी सूत्रसंचालन केले. आनंद सराफ यांनी आभार मानले.