पुणे- अतिवृष्टीमुळे सांगली व कोल्हापूर जिल्ह्यांमध्ये पूरस्थिती निर्माण होऊन तेथील जनजीवन विस्कळीत झाले आहे. तेथील पूर आता ओसरत असून परिसरामध्ये रोगराई पसरू नये म्हणून स्वच्छता व निर्जंतुकीकरण मोठ्या प्रमाणावर करणे आवश्यक असून याकामी पुणे महानगरपालिकेकडून मनुष्यबळ व उपकरणे पाठवण्यात आली. या मदत कार्यासाठी पुणे महानगरपालिकेकडून ६० लोकांचे मदतपथक कोल्हापूर येथे पाठवण्यात आले. या मदतपथकाला कोल्हापूर येथे जाणे व येणेसाठी पीएमपीएमएल कडून २ मिडी बसेस २ चालक व २ मेकॅनिकसह उपलब्ध करून देण्यात आल्या आहेत. प्रादेशिक परिवहन कार्यालयाच्या आवश्यक त्या परवानगीसह पीएमपीएमएल कडून २ मिडी बसेस पुणे महानगरपालिकेला मदत कार्यासाठी देण्यात आल्या आहेत.सदरच्या २ मिडी बसेस पुणे महानगरपालिकेला तातडीने आवश्यक त्या पुर्ततेसह उपलब्ध करून देण्याबाबत पीएमपीएमएल चे अध्यक्ष व व्यवस्थापकीय संचालक लक्ष्मीनारायण मिश्रा व सहव्यवस्थापकीय संचालक डॉ. चेतना केरूरे यांनी पीएमपीएमएल च्या अधिकाऱ्यांना सूचित केले होते. त्या अनुषंगाने अधिकाऱ्यांनी आवश्यक त्या परवानगी
व पुर्ततेसह या बसेस उपलब्ध करून दिल्या. पुण्याचे प्रादेशिक परिवहन अधिकारी.अजितकुमार शिंदे यांनी आवश्यक ती परवानगी तातडीने देऊन मोलाचे सहकार्य केले.