पुणे- पुण्यात गुरुवारी मोठ्या उत्साहात गणपती विसर्जन सोहळा पार पडला. विसर्जन मिरवणुकीत गणेशभक्तांसह अनेक नेतेमंडळीही सहभागी झाले होते. महापौर मुक्ता टिळक यादेखील विसर्जन मिरवणुकीत सहभागी होत्या. यावेळी महापौर मुक्ता टिळक यांनी ‘मला आमदार झाल्यासारखं वाटतंय’ गाण्यावर ठेका धरत सर्वांचं लक्ष वेधून घेतलं.
तसे महापौर कोणीही असो कधीही असो ,गणेश विसर्जन मिरवणूकीचा आनंद आपापल्या परीने घेत असतात ,तसा त्यांनी आनंद घेतला …
आगामी विधानसभा निवडणुकीला अवघे काही दिवस शिल्लक राहिले आहेत. प्रत्येक राजकीय पक्षाकडून उमेदवारांची चाचपणी केली जात आहे. याचदरम्यान गणेशोत्सव आल्याने राज्यातील अनेक भागात इच्छुक उमेदवार गणेश मंडळांच्या गाठीभेटी घेताना पहावयास मिळाले. गुरुवारी लाडक्या गणरायाला सर्वांनी निरोप दिला. विसर्जन मिरवणुकांमध्ये सहभागी होत राजकीय मंडळीनी कार्यकर्त्यांना पुन्हा एकदा संवाद साधण्याचा प्रयत्न केला.
पुण्यात देखील सकाळपासून भव्य अशा मिरवणुका काढण्यात आल्या. या मिरवणुकीला पुणेकर नागरिकांनी उस्फूर्त प्रतिसाद दिला. तर या सर्व मंडळाचे स्वागत महापौर मुक्ता टिळक यांनी अलका चौकात उभारण्यात आलेल्या मंडपामध्ये श्रीफळ देऊन केले. यावेळी महापौर मुक्ता टिळक यांना एका गाण्यावर ठेका धरण्याचा मोह आवरला नाही . ते गाणं होतं ‘मला आमदार झाल्यासारखे वाटतंय’…त्यांनी पाहता पाहता या गाण्यावर ठेका धरला.
महापौर मुक्ता टिळक या आगामी विधानसभा निवडणुकीसाठी कसबा मतदार संघातून भाजपकडून इच्छुक आहेत. याच मतदारसंघातून भाजपकडून अनेक नेते मंडळी इच्छुक असल्याने महापौर मुक्ता टिळक यांना उमेदवारी देणार काय ? हे पाहावे लागणार आहे.