पुणे- पुणे महापालिकेत आयुक्तालयात आपली तुटपुंज्या वेतनाची गाऱ्हाणी मांडून पुन्हा रणांगणात गेलेय आरोग्य सेविकांचा किस्सा मायमराठी णे चव्हाट्यावर आणल्यानंतर आज श्रीमती काशीबाई नवले हॉस्पिटल मध्ये गेले सहा महिने पासून कर्मचाऱ्यांचे पगार मिळाले नसल्यामुळे आज डॉक्टर, नर्स व इतर कर्मचारी यांनी पगारासाठी आंदोलन केले.
सध्या पुणे शहरातील करोना बधिताचा आकडा सहा हजारापेक्षा जास्त झाला असून काशीबाई नवले हॉस्पिटल मध्ये ८० करोना बाधित रुग्ण उपचार घेत आहेत. तसेच ६० जण आयसोलेशन मध्ये आहेत. असे असताना इथले डॉक्टर, नर्स व इतर कर्मचारी आपला जीव धोक्यात घालून त्यांचेवर उपचार करीत आहेत. परंतु गेली सहा महिने या कर्मचाऱ्यांचा पगार झाला नसल्यामुळे त्यांचेवर उपासमारीची वेळ आली आहे. त्यामुळे आज सर्वजण रस्त्यावर उतरले व पगाराची मागणी केली.
सदर हॉस्पिटलमध्ये डॉक्टर, नर्स क्लार्क लॅब टेक्निशियन, स्वच्छता कर्मचारी असे एकूण 2 हजार 500 पर्यंत कर्मचारी काम करत असून रुग्णालय प्रशासनाने गेले सहा महिने पगार केलेला नसल्यामुळे येथील कर्मचारी आर्थिक अडचणीत आले असून जीवनावश्यक वस्तू ही घेणे त्यांना अवघड झाले आहे.
आत्तापर्यंत सदर कर्मचाऱ्यांनी आपल्या ओळखीच्या दुकानदाराकडून उधारीवर किराणामाल वगैरे भरला असला तरी आता पैसे दिले नसल्यामुळे दुकानदारांनी किराणामालही देणे बंद केले आहे. त्यामुळे या कर्मचाऱ्यावर उपासमारीची वेळ आली आहे. तरीही हे कर्मचारी काम करीत आहे. मात्र प्रशासनाकडून केवळ आश्वासनाची गाजरे दाखवली जात असल्यामुळे तोंड दाबून बुक्यांचा मार सहन करावा लागत आहे असे कर्मचाऱ्यांकडून बोलले जात आहे.
याबाबत येथील हॉस्पिटलच्या डीन, शालिनी सरदेसाई यांना माहिती विचारली असता आमचे प्रयत्न चालू असून समाज कल्याण कार्यालयाकडून व विद्यार्थ्यांकडून फी मिळाली की पगार देणेबाबत कार्यवाही केली जाईल अशी माहिती दिली.