पुणे : कोंढव्यातील टिळेकरनगर परिसरात वर्चस्वाच्या वादातून गुंडांच्या टोळ्यांमध्ये झालेल्या वादातून वाहनांची कोयता, तलवारीने तोडफोड करण्यात आल्याची घटना घडली. टोळक्याने दहशत माजवून १५ वाहनांची तोडफोड केली. या प्रकरणी हृषिकेश सुरेश गोरे (वय २०), सुशील राजेंद्र दळवी (वय २०), प्रवीण अशोक भोसले (वय१८) यांना अटक करण्यात आली. कोंढव्यातील टिळेकगनर भागात दोन टोळ्यांमध्ये वाद आहेत. वर्चस्वातून गुंड टोळ्यांमध्ये वाद झाले. रात्री दुचाकीवरून दहा ते बाराजण टिळेकरनगर भागात आले. टोळक्याकडे कोयता, तलवार आणि तीक्ष्ण शस्त्रे होती. टोळक्याने सहा मोटारी, तीन दुचाकी, चार टेम्पो तसेच एका रिक्षाची तोडफोड केली. पसार झालेल्या आरोपींचा शोध घेण्यात येत आहे.या घटनेमुळे परिसरात घबराट उडाली.