पुणे-अखिल भारतीय मराठा शिक्षण परिषदेच्या अनंतराव पवार कॉलेज ऑफ इंजिनिअरिंग अँड रिसर्च पर्वती, पुणे महाविद्यालयात संगणक विभागाच्या वतीने मेटाव्हर्स : इंट्रोडक्शन अँड इंटरडीसिप्लीनरी ॲप्लीकेशन या विषयावर दोन दिवशीय राष्ट्रीय कार्यशाळा संपन्न झाली. या कार्यशाळेचे उद्घाटन अखिल भारतीय मराठा शिक्षण परिषदेचे संयुक्त चिटणीस ॲड. भगवानराव साळुंखे, खजिनदार विजयसिंह जेधे, महाविद्यालय विकास समितीचे सदस्य धैर्यशील वंडेकर, अक्षय पासलकर फाऊडर स्प्रे डिजिटल, सुभाष बाल, प्राचार्य डॉ.सुनील ठाकरे यांचे उपस्थितीत झाले.या प्रसंगी बोलताना धैर्यशील वंडेकर यांनी गेमिंग, मनोरंजन (एंटरटेनमेंट), प्रॉडक्शन, शॉपिंग, शिक्षण (एज्युकेशन), वैद्यकीय क्षेत्र (मेडिकल सेक्टर), संरक्षण क्षेत्र, सायबर विश्व अशा वेगवेगळ्या क्षेत्रात मेटावर्सचा वापर कसा करावा या दृष्टीने सुरु असलेल्या संशोधनाची माहिती दिली. भविष्यात माणूस एका सुरक्षित ठिकाणी बसून मेटावर्स तंत्रज्ञानाचा वापर करून त्याची कामं सहजरित्या करू शकेल. हे करताना त्याला संबंधित ठिकाणी प्रत्यक्ष उपस्थित असल्याचा अनुभव तंत्रज्ञानाच्या मदतीने घेता येईल. मेटावर्स तंत्रज्ञानामुळे वास्तव आणि आभासी जग यांच्यातील दरी कमी होण्यास मदत होईल. विद्यार्थ्यांनी या बदलत्या तांत्रिक प्रवाहाबरोबर आपण स्वतःला देखील नवीन कौशल्य आत्मसात करून स्वतःला अपडेट केले पाहिजे असे आवाहन या प्रसंगी केले. अक्षय पासलकर यांनी मेटाव्हर्स च्या माध्यमातून केवळ संप्रेषण नाही तर वेगवेगळ्या प्रकारच्या सुविधांचा लाभ आपण घेऊ शकतो. त्यामध्ये वस्तुंची खरेदी विक्री, आपल्या मित्रांना भेटण्याची संधी, व्ही आर अर्थात व्हर्च्युअल रिअॅलिटी सारख्या वेगवेगळ्या गोष्टींचा आपल्याला लाभ घेता येणार आहे. यासगळ्या गोष्टी सुरळीत व्हाव्यात म्हणून त्याला आर्टिफिशयल इंटेलिजिन्सची जोडही देण्यात आली आहे असे मार्गदर्शन केले.
सदर कार्यशाळेसाठी ॲड. भगवानराव साळुंखे, विजयसिंह जेधे, धैर्यशील वंडेकर, अक्षय पासलकर प्राचार्य डॉ.सुनिल ठाकरे, प्रा.रमा गायकवाड, कार्यशाळेचे समन्वयक प्रा.प्रांजल मोरे, प्रा.जितेंद्र मुसळे, सर्व विभाग प्रमुख, प्राध्यापक व विद्यार्थी उपस्थित होते. या कार्यशाळेचे आयोजन प्रा.रमा गायकवाड यांनी प्राचार्य डॉ.सुनिल ठाकरे यांचे मार्गदर्शनाखाली केले. सूत्रसंचालन प्रा.प्रांजल मोरे यांनी केले तर प्रा.अनिल लोहार यांनी आभार मानले. महाविद्यालयाने नाविन्यपूर्ण विषयावर कार्यशाळेचे आयोजन केल्याबद्दल अखिल भारतीय मराठा शिक्षण परिषदेच्या सरचिटणीस मा.सौ.प्रमिला गायकवाड यांनी सर्वांचे अभिनंदन केले.