पुणे- राष्ट्रवादीच्या सांस्कृतिक सेल मध्ये काम करणाऱ्या प्रसिद्ध अभिनेत्री प्रिया बेर्डे यांनी सांस्कृतिक विभागाच्या प्रदेशअध्यक्षांच्या कार्यपद्धतीला कंटाळून भाजपात प्रवेश केल्यावर आता प्रिया बेर्डे यांना टक्कर द्यायला स्वर्गीय निळू फुले यांच्या कन्या गार्गी फुले यांना आज विरोधी पक्षनेते अजित पवार, राष्ट्रवादी काँग्रेसचे प्रदेशाध्यक्ष जयंत पाटील यांच्या उपस्थितीत राष्ट्रवादी काँग्रेसमध्ये प्रवेश देण्यात आला आहे. आता राजकारणात मुख्य प्रवाहात येत काम करायचे, पक्षाने तिकीट दिले तर का नाही लढायचे असे मत गार्गी फुले यांनी व्यक्त केले आहे.
गार्गी फुले म्हणाल्या की, खूप दिवसांपासून अजित पवार यांच्यासोबत काम करण्याची इच्छा होती. पक्षासोबत काम करण्याचे मला अनेक दिवसांपासून वाटत होते. यात माझ्या वडीलांचे आणि शरद पवारांचे चांगले संबंध होते. आता पक्षासाठी काहीतरी करण्याची इच्छा आहे. त्यातच मला पक्षात काम करण्यासंदर्भात विचारणा झाल्यानंतर लगेचच हो म्हटले. राष्ट्रवादी पक्षाची जी विचारसरणी आणि विचार आहेत. त्याच विचारसरणीचे माझे बाबा निळू फुले होते. त्यामुळे माझ्या वडिलांचे जे विचार होते. त्या विचारांना राष्ट्रवादी काँग्रेसला न्याय देईल. आता नुसते किनाऱ्यावर बसून पाहायचे नाही आहे त्यामुळे मी राष्ट्रवादी काँग्रेसमध्ये येऊन प्रवाहात येईल.
गार्गी फुले म्हणाल्या की, अनेक तरुणांना वाटते की आपण राजकारणात यावे आणि काही तरी बदल घडावा. मी याच साठी काम करणार आहे असे मत त्यांनी व्यक्त केले आहे. तर पक्षांने संधी दिली तिकीट दिले तर मी निवडणूक का नाही लढणार, असे म्हणत आपली निवडणूक लढण्याची इच्छा व्यक्त केली आहे.