पुणे-हिंदी चित्रपटामध्ये सहकलाकार म्हणून काम करणाऱ्या चार जणांना चित्रीकरणासाठी जाताना अज्ञात आरोपींनी धारदार शस्त्राचा धाक दाखवून त्यांना लुटल्याचा प्रकार पुण्यातील बी. टी. कवडे रस्त्यावर घडला आहे.याबाबत इम्रान खान (वय- 21, रा. सय्यदनगर, महंमदवाडी रस्ता, हडपसर,पुणे) याने याप्रकरणी आरोपी विरोधात वानवडी पोलिस ठाण्यात फिर्याद दिली आहे. तक्रारदार इम्रान खान हिंदी चित्रपटात सहकलाकार म्हणून काम करत आहे. खान आणि त्याचे सहकारी हर्ष नाथे, जिशान पटणी चित्रीकरणासाठी मुंबईला जात होते. पहाटे चार वाजण्याच्या सुमारास ते बी. टी. कवडे रस्त्यावर बसची वाट पाहत रस्त्यावर थांबले होते.
त्यावेळी तेथील एका टपरीवर ते चहा पित उभे होते. त्याचवेळी तिथे एक अनोळखी व्यक्ती आला. त्याच्याबरोबर त्याचे साथीदारही होते.अचानक त्यांनी खान, नाथे, पटणी यांना तीक्ष्ण शस्त्राचा धाक दाखविला. चोरट्यांनी त्याच्या खिशातील रोकड जबरदस्तीने काढून घेण्याचा प्रयत्न केला. खान याचे सहकारी नाथे आणि पटणी यांना बेदम मारहाण करुन त्यांच्याकडील रोकड आणि मोबाइल फोन हिसकावून चोरटे अंधारात पसार झाले आहे. याबाबत पुढील तपास पोलिस उपनिरीक्षक एस सोनवणे करत आहेत.