पुणेः “जी२० आंतरपंथिय परिषद २०१९” टोकियो येथे सुरू आहे. यावेळी एमआयटी वर्ल्ड पीस युनिव्हर्सिटीचे संस्थापक अध्यक्ष प्रा.डॉ. विश्वनाथ दा. कराड यांनी आयर्लंडचे माजी पंतप्रधान एन्डा केनी यांची भेट घेऊन त्यांच्याशी विश्वशांती विषयावर विस्तृत चर्चा केली.
याप्रसंगी डॉ. विश्वनाथ कराड यांनी माजी पंतप्रधान एन्डा केनी यांना ‘विश्वशांती डोम’ (तत्त्वज्ञ संत श्री ज्ञानेश्वर – तुकाराम विश्वशांती प्रार्थना सभागृह) ची प्रतिमा भेट दिली. ही प्रतिमा पाहताच त्यांनी आश्चर्य व्यक्त केले व म्हणाले की मानवतेसाठी निर्मित हा घुमट पाहण्यासाठी मी पुण्यात येईल. तसेच त्यांनी भारतीय संस्कृती व भारतीय लोकांबद्दल गौरवोद्गार काढले.
यावेळी एमआयटी डब्ल्यूपीयूच्या शिष्टमंडळातील एमआयटी वर्ल्ड पीस युनिव्हर्सिटीचे कार्याध्यक्ष प्रा. राहुल विश्वनाथ कराड, नागपूर विद्यापीठाचे माजी कुलगुरू डॉ.एस.एन.पठाण आणि मिटसॉटचे प्रकल्प संचालक डॉ.मिलिंद पांडे हे उपस्थित होते.