पुणे दि.२७: सार्वजनिक आरोग्य विभागातर्फे नवरात्र महोत्सवानिमित्त ‘माता सुरक्षित तर घर सुरक्षित’ अभियानाचा शुभारंभ २८ सप्टेंबर रोजी सकाळी ११ वा. सार्वजनिक आरोग्य मंत्री प्रा. डॉ. तानाजी सावंत यांच्या हस्ते व पालकमंत्री चंद्रकांत पाटील यांच्या अध्यक्षतेखाली एस.एन.डी.टी महिला विद्यापीठ कोथरूड येथे होणार आहे.
यावेळी सकाळी ९ ते ५ या वेळेत महिला आरोग्य तपासणी शिबीराचेही आयोजन करण्यात आले आहे. या शिबीरामध्ये विद्यार्थिनी, महिलांची आरोग्य तपासणी तसेच समुपदेशन व उपचारात्मक आरोग्य सेवा उपलब्ध करुन देण्यात येणार आहे. शारीरिक स्वास्थ, मानसिक स्वास्थ, योगा, व्यसनमुक्ती, पोषण आहार, वैयक्तिक स्वच्छता या विषयांवर संबोधन करुन वैयक्तिक समुपदेशन करण्यात येणार आहे.
कार्यक्रमाला खासदार गिरीश बापट यांच्यासह लोकप्रतिनिधी उपस्थित राहणार आहेत. २६ सप्टेंबर ते ४ ऑक्टोबर या कालावधीत अभियान राबविण्यात येणार आहे, अशी माहिती जिल्हा शल्यचिकित्सक डॉ. अशोक नांदापूरकर यांनी दिली.