माजी केंद्रीय मंत्री, खा. प्रकाश जावडेकर यांच्या हस्ते उद्घाटन
पुणे (प्रतिनिधी)-
‘लाईटहाऊस ही नागरिकांना स्वत:च्या पायावर उभी करणारी अभिनव योजना पुणे महानगर पालिकेच्या वतीने राबवण्यात येत असून पुणेकर नागरिकांना मुलभूत सुविधा देण्याबरोबरच याबरोबरच त्यांच्या सर्वांगीण उन्नतीसाठी योजना राबवाव्यात, असे मत भारतीय जनता पक्षाचे प्रदेशाध्यक्ष चंद्रकांत पाटील यांनी व्यक्त केले. पुण्याच्या महापौरांमध्ये दूरदर्शीत्त्व आहे, अशा शब्दात पाटील यांनी महापौर मोहोळ यांचा गौरवही केला.
महापौर मुरलीधर मोहोळ यांच्या प्रयत्नातून आणि पुणे महानगरपालिका व पुणे सिटी कनेक्ट यांच्या संयुक्त विद्यमाने कोथरूडच्या आयडियल कॉलनी येथे लाईट हाऊस प्रकल्प साकारला असून याचे उद्घाटन माजी केंद्रीय मंत्री आणि राज्यसभा खासदार प्रकाश जावडेकर यांच्या हस्ते आणि पाटील यांच्या अध्यक्षतेखाली संपन्न झाले. त्यावेळी पाटील बोलत होते. यावेळी उपमहापौर सुनीता वाडेकर, सभागृह नेते गणेश बिडकर, पुणे सिटी कनेक्टचे अध्यक्ष डॉ. गणेश नटराजन, नगरसेविका वासंती जाधव, हर्षाली माथवड, मंजुश्री खर्डेकर, अल्पना वरपे, डॉ. श्रध्दा प्रभुणे, वृषाली चौधरी, स्वप्नाली सायकर, नगरसेवक जयंत भावे, कोथरूड विधानसभा भाजप अध्यक्ष पुनीत जोशी यांची उपस्थिती होती.
पाटील पुढे म्हणाले, लाईटहाऊस येथून शिक्षण घेऊन तंत्रकुशल झालेल्या युवकांना व्यवसाय सुरु करण्यासाठी अर्थसहाय्य उपलब्ध करून देता येईल का? उत्पादनांना बाजारपेठ उपलब्ध करून देण्यासाठी काय करता येऊ शकते? याचा विचारही महापालिका आणि महापौरांनी केल्यास अधिक उत्तम होईल’. खा. जावडेकर म्हणाले, पंतप्रधान मोदींच्या मार्गदर्शनाखाली सुरु करण्यात आलेल्या कौशल्य विकास योजने अंतर्गत भारत संपूर्ण जगाला तंत्रकुशल मनुष्यबळ पुरवेल, याची खात्री आहे. तंत्रकुशल व्यक्तींची मागणी जागतिक स्तरावर आहे, त्यामुळे हा उपक्रम सुरु करून तरुण वर्गाला रोजगाराभिमुख शास्त्रशुद्ध शिक्षण देण्याचे काम पुणे महापालिका करत आहे. त्यासाठी मी पुण्याच्या महापौरांचे आणि पुणे महापालिकेचे विशेष अभिनंदन करतो’.
महापौर मोहोळ म्हणाले, ‘पुण्यातील प्रत्येक नागरिकाला उत्तम नागरी सुविधा पुरवणे, हे महापालिकेचे ध्येय आहे. केवळ भौतिक सुविधा उपलब्ध करून देणे इतकेच महापालिकेचे ध्येय नसून पुणेकरांचे जीवनमान सर्वांगाने उन्नत व्हावे, यासाठी आम्ही प्रयत्नशील आहोत. पुणे शहरातील तरुणांच्या उज्ज्वल भवितव्यासाठी, त्यांना आत्मनिर्भर बनवण्यासाठी लाईट हाऊस ही संकल्पना आकाराला आलेली आहे.ब्हे पुण्यातील ११वे लाईट हाऊस आहे’.
‘लाईट हाऊसच्या माध्यमातून, मध्यम आणि कनिष्ठ मध्यमवर्गीय कुटुंबातील मुलांना चांगले करियर करायची संधी उपलब्ध करून दिली जात आहे. ४० विविध अभ्यासक्रम या लाईट हाऊसच्या माध्यमातून चालवले जातात. शहरातील साडेतीन लाख तरुणांपर्यंत पोहोचून त्यांना तंत्रकुशल बनवण्याचे आणि व्यवसायाभिमुख प्रशिक्षण देण्याचे आव्हान आपल्या समोर आहे. हा प्रकल्प या कार्यात निश्चितच उपयोगी ठरत आहे. पंतप्रधान मोदींच्या आत्मनिर्भर भारत या संकल्पनेलाच अनुसरून हा उपक्रम हाती घेण्यात आला आहे. कोथरूड येथील लाईट हाऊसला विद्यार्थ्यांचा उदंड प्रतिसाद लाभल्यामुळे १०० ते १५० क्षमता असणाऱ्या या लाईट हाऊसची क्षमता वाढवून ४५० विद्यार्थी एका बॅचमध्ये शिकू शकतील एवढी करण्यात आलेली आहे’, असेही महापौर मोहोळ म्हणाले. कार्यक्रमाचे आभार नगरसेविका हर्षाली माथवड यांनी मानले.