पुणे : अभियंता असलेल्या पुण्यातील राधिका जहागीरदार यांना ‘मिसेस महाराष्ट्र २०१९’चा बहुमान मिळाला आहे. दिवा पेजेंट्सच्या वतीने आयोजित ‘मिसेस महाराष्ट्र’ या सौंदर्यवती स्पर्धेत राधिका यांनी सर्वच आघाड्यांवर उत्कृष्ट कामगिरी करत ‘मिसेस महाराष्ट्र’चा मुकुट पटकावला. पुण्यातील हयात हॉटेलमध्ये नुकतीच ही स्पर्धा पार पडली. राज्यभरातून एकूण ५० सौंदर्यवतींनी यामध्ये भाग घेतला होता. बौद्धिक स्पर्धा, स्वपरिचय, आकर्षक देहबोली, प्रश्नोत्तरे अशा वेगवेगळ्या पातळ्यांवर आघाडी घेत राधिकाने अंतिम फेरीत प्रवेश मिळविला. अंतिम फेरीतील १२ जणींमध्ये उल्लेखनीय परफॉर्मन्स देत राधिकाने प्रथम क्रमांक मिळवला.
स्पर्धेचे परीक्षक म्हणून बॉलिवूड अभिनेत्री झोया अफरोज, मराठी अभिनेत्री वर्षा उसगावकर व प्रसिद्ध हिंदी अभिनेता गुलशन ग्रोवर यांनी काम पहिले. यावेळी ‘दिवा पेजेन्ट्स’च्या संचालिका अंजना मस्कारेन्हास, कार्ल मस्कारेन्हास, राधिकाचे कुटुंबीय उपस्थित होते. या बहुमानाबद्दल राधिकाने आनंद व्यक्त केला. राधिका म्हणाल्या, “मी मूळची अमरावतीची असून, सध्या पुण्यातील कमिन्स टेक्नॉलॉजी सेंटरमध्ये अभियंता म्हणून कार्यरत आहे. माझे पती निशिज हेही सॉफ्टवेअर अभियंता आहेत. मला आठ वर्षांची ईवा नावाची मुलगी आहे. माझ्या या प्रवासात पती निशीज, सासू सासरे आणि आई वडीलांच्या पाठिंबा मिळाला. त्यांनी दिलेल्या प्रोत्साहनामुळे आणि अंजना व कार्ल सरांच्या मार्गदर्शनामुळे हे यश मिळवू शकले.”
राधिका गेल्या १७ वर्षांपासून पुण्यात राहत आहेत. त्यांनी ‘व्हीआयटी’मधून मेकॅनिकल इंजिनिअरिंगचे, तर बिट्स पिलानी मधून मास्टर्सचे शिक्षण घेतले असून, ऑटोमोबाईल क्षेत्रात कार्यरत आहेत. बाईक रायडींग, प्रवास, नृत्य यामध्येही त्यांना विशेष रुची आहे. अनाथ मुलांसाठी गेल्या १० वर्षांपासून त्या काम करीत आहेत. सौंदर्य स्पर्धेनंतर राधिकाने सर्व तरुण मुलींना, आपली स्वप्ने प्रत्यक्षात आणण्याचा प्रयत्न करा, असा संदेश दिला. राधिका सामाजिक कार्यात सतत संवेदनशीलरीत्या कार्यरत असतात. समाजाचा एक घटक म्हणून जगताना कुणाकडून काही घेण्यापेक्षा इतरांना देण्यात मला जास्तं आनंद मिळतो, अशी भावनाही त्यांनी यावेळी व्यक्त केली.