अथर्व चांडकने ९५% मिळवत प्रथम क्रमांक पटकावला
पुणे : टिळक रस्त्यावरील महाराष्ट्र विद्यार्थी सहायक मंडळ संचालित अशोक विद्यालय व कनिष्ठ महाविद्यालयाच्या विज्ञान शाखेचा निकाल ९८.३६ टक्के लागला आहे. अथर्व चांडक (९५%), साईराज कांबळे (९२%), सिमरन खन्ना आणि अपूर्वा होतकर (९१%) यांनी अनुक्रमे प्रथम, द्वितीय व तृतीय क्रमांक पटकावला. अथर्वने ९५ टक्के मिळवत जेईईच्या परीक्षेत महाराष्ट्रात प्रथम क्रमांक पटकवला आहे.
विद्यार्थ्यांच्या या यशाबद्दल संस्थेच्या चेअरमन श्रीमती सुमन घोलप यांनी अभिनंदन केले. दरवर्षी प्रमाणे यंदाही विद्यार्थ्यानी कौतुकास्पद कामगिरी केल्याचेही त्यांनी सांगितले. चांडक याची जेईई परीक्षेत निवड झाल्याबद्दल त्याचे अभिनंदन केले. विद्यार्थ्यांच्या या यशामागे त्यांचा जेवढा हातभार असतो, तेवढाच शिक्षकांचाही हातभार असतो, असे सांगत सर्व शिक्षकांचेही त्यांनी कौतुक केले. यावेळी संस्थेचे सचिव डॉ. विकास आबनावे, कनिष्ठ महाविद्यालयाच्या प्रमुख सौ. रेखा दराडे, विद्यार्थी मार्गदर्शक प्रथमेश आबनावे, सौ. ज्योती हिरे, कार्यकारी मंडळ सदस्य प्रसाद आबनावे यांनीही विद्यार्थ्यांचे अभिनंदन केले. प्रत्येक वर्षी अशाच पद्धतीने चांगले गुण मिळवून विद्यार्थी आमची मान उंचावतात. दरवर्षी विद्यार्थ्यांचा यशाचा टक्का हा वाढतच जातो, याबद्दल मला अभिमान आहे, असे संस्थेचे सचिव डॉ. विकास आबनावे यांनी सांगितले.