पुणे: प्रसिद्ध उद्योजक हणमंतराव गायकवाड चेअरमन असलेल्या बीव्हीजी ग्रुपच्या कार्यालयावर आज आयकर विभागाने छापे मारले. आयकर विभागाचे धाडसत्र अजूनही सुरूच असल्याने पुण्यात खळबळ उडाली आहे. तर आम्ही नियमाविरोधात काहीही केलेले नसल्याचं सांगत आकसापोटी ही कारवाई करण्यात आल्याचा आरोप गायकवाड यांनी केला आहे. बीव्हीजी ग्रुपचे चेअरमन हनमंतराव गायकवाड यांनी वैयक्तिक द्वेषापोटी ही कारवाई करण्यात आल्याचा आरोप करतानाच आयकर विभागाच्या चौकशीला आम्ही पूर्ण सहकार्य करणार असल्याचं स्पष्ट केलं. आम्ही नियमांविरोधात कोणतंही काम केलं नाही. कंपनीची प्रगती होत असल्यानेच ही कारवाई होत आहे. आयकर विभागाचे अधिकारी त्यांच्या नियमित प्रशासकीय प्रक्रियेचा भाग म्हणून बीव्हीजी कार्यालयाकडे आले आहेत. तळागाळातल्या सामान्य माणसाला रोजगार देणाऱ्या आमच्या समुहात कोणतेही चुकीचे काम होत नाही,चालत ही नाही. उलटपक्षी विविध समाज हिताच्या क्षेत्रात बीव्हीजी समूह मोलाचे योगदान देत आहे. कृपया याची नोंद घ्यावी, असं गायकवाड यांनी म्हटलं आहे.
पिंपरी-चिंचवड येथे बीव्हीजी ग्रुपचं कार्यालय आहे. आज पहाटे आयकर विभागाच्या अधिकाऱ्यांनी अचानक बीव्हीजीच्या कार्यालायत छापे मारले. बीव्हीजीच्या मुंबई, पुणे आणि दिल्लीतील कार्यालयावरही धाडी मारण्यात आल्या आहेत. अद्यापही आयकर विभागाची कारवाई सुरू असून बीव्हीजी कार्यालयात येण्यास इतरांना मज्जाव करण्यात आला आहे. विविध प्रकारच्या सेवा पुरविणाऱ्या बीव्हीजी ग्रुपवर धाडी मारण्यात आल्याने पुण्यात एकच खळबळ उडाली आहे.
वैद्यकीय सेवा, बियाणं, खतं आणि किटकनाशके निर्मिती अशा विविध क्षेत्रात बीव्हीजी ग्रुपचं काम सुरू आहे. केंद्र सरकार, राज्य सरकार आणि पिंपरी-चिंचवड महानगर पालिकेसाठीही या कंपनीने काम केलं आहे. राष्ट्रपती भवनासह विविध ठिकाणी अत्याधुनिक यंत्रांच्या सहाय्याने स्वच्छतेचे काम या कंपनीद्वारे केले जाते.