पुणे-महाराष्ट्र नवनिर्माण सेनेचे जिल्हाध्यक्ष समीर थिगळे यांच्यावर शनिवारी रात्री पिस्तुलातून गोळीबार करण्यात आल्याची घटना राजगुरुनगरच्या सातकरस्थळ येथील त्यांच्या घरासमोर घडली. गुंडांनी गोळ्या झाडल्या ठेवा थिगळे यांचे कुटुंबीय याठिकाणी उपस्थित होते.
या प्रकरणी खेड पोलीस ठाण्यात एका हल्लेखाेराविरोधात गुन्हा दाखल करण्यात आला आहे. थिगळे शनिवारी रात्री सातकरस्थळ गावात घरासमोर थांबले होते. त्यावेळी एक हल्लेखोर तेथे आला. ‘तुला माज आला आहे. एकाला संपवलाय, आज तुलाही संपवतो,’ असे म्हणून हल्लेखोराने थिगळे यांच्यावर पिस्तूल रोखले. हल्लेखाेराने त्यांच्याकडे पैशांची मागणी केली. हल्लेखोराने थिगळे यांच्यावर पिस्तुलातून गोळीबार केला. मात्र, गोळी न सुटल्याने थिगळे बचावले. त्यानंतर हल्लेखोराने पिस्तुलातून हवेत गोळीबार करून दहशत माजविली. हल्लेखोर पसार झाला. गोळीबाराच्या आवाजामुळे परिसरात घबराट उडाली. पसार झालेल्या हल्लेखोराचा पोलिसांकडून शोध घेण्यात येत आहे.
याप्रकरणी राजगुरुनगर पोलिस ठाण्यात मिलिंद जगदाळे आणि मयूर जगदाळे यांच्या विरोधात गुन्हा दाखल करण्यात आला आहे. प्राणघातक हल्ला करत शस्त्राचा वापर करून खंडणी मागितल्या प्रकरणी हा गुन्हा दाखल करण्यात आला आहे. समीर थिगळे यांच्या छातीवर गोळी झाडण्यात आली. पण सुदैवाने पिस्तुलातून गोळी सुटली नाही. त्यामुळे मोठा अनर्थ टळला. त्यानंतर हवेत गोळीबार करून थिगळे यांना घाबरवण्यात आले. त्यांना धमकावून गुंडांनी घटनास्थळावरून पळ काढला. आरोपींवर मोक्का आणि खुनासारख्या गंभीर गुन्ह्याची नोंद आहे. सध्या आरोपी जामिनावर बाहेर आहे.
समीर थिगळे हे मनसेचे पुणे जिल्हाध्यक्ष आहेत. गेल्यावर्षीच एप्रिलमध्ये त्यांची पुणे जिल्ह्याच्या अध्यक्षपदी मनसे अध्यक्ष राज ठाकरे यांनी फेरनिवड केली होती. त्यांच्यावर खेड, आंबेगाव, जुन्नर, शिरुर, हवेली या तालुक्यांची जबाबदारी आहे.