पुणे : महाराष्ट्र नवनिर्माण सेनेचे कसबा विधानसभा उपविभाग अध्यक्ष संग्राम तळेकर (वय 45, रा. खडकमाळ अळी) यांच्यासह चार कार्यकर्त्यांविरुद्ध स्वारगेट पोलिस ठाण्यात गुन्हा दाखल करण्यात आला आहे. स्वारगेट येथील पाणीपुरवठा विभागात पाण्यासाठी आंदोलन करताना कार्यालयाची तोडफोड, अधिकारी आणि कर्मचाऱ्यांना शिवीगाळ आणि शासकीय वाहनाचे नुकसान केल्याप्रकरणी हा गुन्हा दाखल झाला आहे. हे आंदोलन मंगळवारी (ता. 8) सायंकाळी करण्यात आले होते. याप्रकरणी आतिश जाधव (वय 50, रा. चिंतामणीनगर) यांनी फिर्याद दिली आहे.
स्वारगेट पाणी पुरवठा विभागाच्या आवारात पाणी पुरवठा पुरेशा दाबाने होत नाही या कारणावरून संग्राम तळेकर यांनी त्यांच्या कार्यकर्त्यांसह इथे आंदोलन केले.
पाणी पुरवठा विभागाच्या कार्यालयात शिरून स्टाफला पाणी पिण्यासाठी ठेवण्यात आलेला माठ शासकीय वाहनावर फोडण्यात आला. त्यानंतर अधिकारी व कर्मचाऱ्यांना शिवीगाळ करत मारहाण करण्याची धमकी देण्यात आली. त्यामुळे सरकारी कामात अडथळा आणि सरकारी मालमत्तेचे नुकसान केल्याप्रकरणी गुन्हा दाखल करण्यात आला आहे.
आंदोलकांनी केलेल्या तोडफोडीत 25 हजार रुपयांचे नुकसान झाल्याचे फिर्यादीत नमूद आहे. याप्रकरणाचा तपास पोलिस उपनिरीक्षक ए. एस. लाहोटे करीत आहेत.