पुणे, दि. 14 :- मोटार वाहन कर न भरलेल्या व मोटार वाहन कायद्यातील विविध गुन्हयाअंतर्गत जप्त केलेल्या 30 वाहनांचा जाहीर ई-लिलाव उप प्रादेशिक परिवहन कार्यालय, पिंपरी चिंचवड येथे 24 जून 2021 रोजी सकाळी 11 ते संध्याकाळी 5 वाजेपर्यंत ठेवण्यात आला असल्याची माहिती पिंपरी चिंचवडचे उप प्रादेशिक परिवहन अधिकारी यांनी दिली आहे.
ही वाहने उप प्रादेशिक परिवहन कार्यालय,मोशी प्राधिकरण पिंपरी चिंचवड येथील आवारात 14 जून ते 22 जून या दरम्यान कार्यालयीन वेळेत पाहण्यासाठी उपलब्ध आहेत. एकूण 30 वाहने असून यात बस, ट्रक, डी व्हॅन, पिकअप व्हॅन, टुरिस्ट टॅक्सी, जेसीबी इत्यादी वाहनांचा समावेश आहे. ई लिलावाच्या तारखेपर्यंत वाहन कर भरण्याची वाहन मालकांना संधी राहील.
ई-लिलाव होणा-या वाहनांची यादी जिल्हाधिकारी कार्यालय, पुणे, तहसिलदार पुणे शहर व हवेली, जुन्नर, मावळ, मुळशी, खेड, आंबेगाव व उप प्रादेशिक परिवहन कार्यालय, पिंपरी चिंचवड यांचे सूचना फलकांवर जनतेच्या माहितीसाठी लावण्यात आली आहे.
14 जून ते 20 जून कालावधीत www.eauction.gov.in या संकेत स्थळावर नाव नोंदणी करण्यासाठी ऑनलाईन सुविधा उपलब्ध आहे. ऑनलाईन नाव नोंदणी झाल्यानंतर वरील कालावधीत उप प्रादेशिक परिवहन कार्यालय, पिंपरी चिंचवड येथे खटला विभागात सकाळी 11 ते सायंकाळी 5 वाजेपर्यंत प्रत्येक वाहनासाठी रु. 50 हजार रकमेचा “DY RTO PIMPRI CHINCHWAD” या नावे अनामत रकमेचा डीमांड ड्राफ्टसह ऑनलाईन सादर केलेल्या कागदपत्रांच्या प्रती, नाव नोंदणी करणे व कागदपत्रे पडताळणी, मान्य करुन घेण्यासाठी सादर करणे गरजेचे आहे.
लिलावाच्या अटी व नियम उप प्रादेशिक परिवहन कार्यालय, पिंपरी चिंचवड येथील नोटीस बोर्डावर कार्यालयीन कामकाजाच्या दिवशी सकाळी 11 ते सायंकाळी 5 या वेळेत उपलब्ध राहील. ही वाहने ‘ जशी आहेत तशी’ या तत्त्वावर ई- लिलावाद्वारे विकली जातील. कोणतेही कारण न देता हा लिलाव रद्द करण्याचे अथवा तहकूब ठेवण्याचे अधिकार उप प्रादेशिक परिवहन कार्यालय, पिंपरी चिंचवड यांनी स्वत:कडे राखून ठेवले आहेत.