पुणे, दिनांक १७ नोव्हेंबर : ‘राष्ट्रीय पुस्तक न्यास’ ही केंद्र सरकारची पुस्तक प्रकाशन संस्था आणि फर्ग्युसन महाविद्यालयाचा मराठी विभाग यांच्या वतीने महाविद्यालयाच्या ग्रंथालयात १९ ते २१ नोव्हेंबर या कालावधीत ‘राष्ट्रीय पुस्तक न्यास’ने प्रकाशित केलेल्या पुस्तकांचे प्रदर्शन आयोजित करण्यात आले असल्याची माहिती फर्ग्युसन महाविद्यालयाचे प्राचार्य डॉ. रवींद्रसिंग परदेशी यांनी प्रसिद्धी पत्रकाद्वारे कळविली आहे. सकाळी १० ते सायंकाळी ६ वाजेपर्यंत प्रदर्शन सर्वांसाठी खुले राहणार आहे.
परदेशी पुढे म्हणाले, या निमित्ताने तीन दिवसांची राष्ट्रीय भाषांतर कार्यशाळा आयोजित करण्यात आली आहे. या कार्यशाळेमध्ये महाराष्ट्रातून निवडक 15 ते 20 तज्ज्ञ भाषांतरकार सहभागी होणार आहेत. नॅशनल बुक ट्रस्टने प्रसिद्ध केलेल्या इंग्रजी आणि हिंदी भाषेतील सुमारे 20 ते 25 पुस्तकांचे भाषांतर ह्या कार्यशाळेच्या दरम्यान होणार आहे.
प्रदर्शन आणि कार्यशाळेचे उद्घाटन, शुक्रवार, (दि. १९ नोव्हेंबर) सकाळी ११ वाजता फर्ग्युसन महाविद्यालयातील अँफी सभागृहात होणार आहे. डेक्कन एज्युकेशन सोसायटीचे अध्यक्ष डॉ. शरद कुंटे, आकाशवाणीचे माजी संचालक डॉ. सुनील देवधर, सरहद संस्थेचे अध्यक्ष श्संजय नहार, राष्ट्रीय पुस्तक न्यासाचे संचालक युवराज मलिक यांची प्रमुख उपस्थिती राहणार आहे.
या कार्यशाळेमध्ये भाषांतर करताना येणाऱ्या भाषिक अडचणी, सामाजिक-सांस्कृतिक अडचणी यांचा सामना कसा करायचा, भाषिक प्रश्नांवर मार्ग कसे काढायचे याची चर्चा होणार आहे.