पुणे- गेल्या पंचवार्षिक सत्रात ‘माय मराठी’ ने महापालिकेतील मिळकतकर विभागात बोगस कर्मचारी बसत असल्याचा प्रकार चव्हाटयावर आणल्यावर निव्वळ एकास पकडून गुन्हा दाखल करून कारवाई केल्याचे दाखविणाऱ्या महापालिकेच्या टॅॅक्सच्या बोगस पावत्या प्रकरणी आता कोंढव्यात गुन्हा दाखल झाला आहे.मिळकत कर विभागात ३ वर्षांपूर्वी बोगस कर्मचारी बसून कारभार हाकीत असल्याचा प्रकार मायमराठी ने उघडकीस आणला होता मात्र तरीही एकास अटक केल्यानंतर यातील काही जणांना नंतर महापालिका प्रशासनाने बिनधास्त अभय दिले होते.आता महापालिका एकीकडे सर्वच क्षेत्रात उत्पन्नाची भरारी घेत असताना ३ लाख ६५ हजार ८५० रुपयांच्या महापालिकेच्या टॅॅक्सच्या बोगस पावत्या आढळून आल्याने खळबळ उडाली आहे. बोगस गुंठेवारी,बोगस कामगार अशा प्रकरणात गेल्या पाच वर्षात कारवाई का झाली नाही असा प्रश्न वारंवार उपस्थित होतो आहे.
पोलिसांनी सांगितलेल्या माहितीनुसार,५६ वर्षे वयाच्या विजय वालिया या कोंढवा बुद्रुक येथील राहिवाश्याने याबाबत पोलिसात तक्रार नोंदविली आहे.वालिया यांचे येथे कार्पेटचे गोडाऊन आहे.या गोडाऊनला महापालिकेचा टॅॅक्स लावून देतो असे सांगून एक महिला आणि एक पुरुष अशा दोघांनी त्यांच्याकडून ३ लाख ६५ हजार ८५० रुपये घेतले आणि महापालिकेच्या टॅॅक्सपावत्याही दिल्या.मात्र त्यानंतर वालिया यांना संशय आल्याने त्यांनी महापालिकेत चौकशी केली असता या पावत्या बोगस असल्याचे निष्पन्न झाले.या पावत्या कोणी दिल्या ?त्या महापालिकेत केल्या गेल्या काय ? दोन आरोपी नेमके कोण आहेत ? त्यांनी या पावत्या कशा कोठे बनविल्यात? आणि अशा प्रकारे किती जणांची फसवणूक झालेली आहे अशा सर्व बाबींवर प्रकाशझोत टाकण्यासाठी कोंढवा पोलीस ठाण्यातील फौजदार सचिन खेतमाळ्स हे अधिक तपास करीत आहेत .