पुणे – पुणे महानगरपालिकेच्या चार विषय समित्यांचे अध्यक्ष व उपाध्यक्ष पदासाठी आज (बुधवारी) निवडणुका घेण्यात आल्या. या निवडणुकीत अपेक्षेप्रमाणे सत्ताधारी भारतीय जनता पक्षाने चारही समित्या जिंकल्या. महापालिकेच्या शहर सुधारणा समिती, महिला व बालकल्याण समिती,विधी व क्रीडा समितीच्या अध्यक्ष व उपाध्यक्ष पदासाठी बुधवारी निवडणुका घेण्यात आल्या. महात्मा फुले सभागृहात पालिकेच्या नवीन इमारतीत ही निवडणूक झाली.
निवडणुकीपूर्वीचे अंतिम वर्ष असल्याने सत्ताधारी भाजपने सर्व मतदारसंघातून प्रतिनिधित्व कसे मिळवायचे याचा प्रयत्न केला आहे.शहर सुधार समितीच्या अध्यक्षपदी आनंद रीठे व उपाध्यक्षपदी उमेश गायकवाड यांची निवड झाली तर विधी समितीच्या अध्यक्ष पदी बापूराव कर्णे गुरुजी व उपाध्यक्षपदी संदीप जऱ्हाड यांची निवड झाली. तसेच महिला व बालकल्याण समितीच्या अध्यक्षपदी रुपाली धाडवे व उपाध्यक्ष पदी अर्चना मुसळे यांची निवड झाली. तर क्रीडा समितीच्या अध्यक्षपदी अजय खेडेकर व उपाध्यक्षपदी ज्योती कळमकर यांची निवड झाली. भूजल सर्वेक्षण विभागाचे संचालक मल्लिनाथ कलशेट्टी हे अध्यक्षस्थानी होते.नवीन अध्यक्ष व उपाध्यक्ष यांचे पालिकेच्या पदाधिकाऱ्यांच्या हस्ते सत्कार करण्यात आला. यावेळी महापौर मुरलीधर मोहोळ, सभागृह नेते गणेश बिडकर, स्थायी समिती अध्यक्ष हेमंत रासणे, नगरसचिव शिवाजी दौंडकर उपस्थित होते.