पुणे- : खळखळ वाहणारा धबधबा… हिरव्यागार डोंगरदऱ्या अन् खडकवासला धरणाचा
अथांग जलाशय… अशा निसर्गाला आपल्या चित्र व छायाचित्रांमध्ये टिपण्याचा आनंद
चिमुकल्यांपासून ते आजी-आजोबांपर्यंत सगळ्यांनी शनिवारी व रविवारी घेतला. निमित्त होते,
“डीएसके विश्वरंग’ या स्पर्धेचे. डीएसके डेव्ह्लपर्स तर्फे घेण्यात आलेल्या दोन
दिवसीय ‘विश्वरंग’ या चित्रकला व फोटोग्राफी स्पर्धेमध्ये पुण्यातील आणि इतर
शहरातील नागरिकांनीही उत्स्फूर्त प्रतिसाद दिला. ही स्पर्धा डीएसके विश्व येथे घेण्यात आली
होती तसेच या स्पर्धेमध्ये एकूण सहा हजाराहून अधिक स्पर्धक सहभागी झाले होते.
या स्पर्धेच्या पहिल्याच दिवशी दोन हजाराहून अधिक स्पर्धकांनी सहभाग नोंदविला
होता. शालेय व महाविद्यालयीन विद्यार्थी, युवक-युवती, व त्याचबरोबर ज्येष्ठ नागरिकांनी
देखील हिरारीने सहभाग घेतला.”किलबिल’, “जल्लोष’, “रिमझिम’ व “सावली’ अशा चार
वयोगटांची रचना स्पर्धेसाठी करण्यात आली होती. सिद्धिविनायक मंदिर, पु.ल. देशपांडे कट्टा,
नेचर पार्क, खडकवासला, सिंहगड पॉइंट, जॉगिंग ट्रॅक, व्हॅली व्ह्यू अशा सहा खास ठिकाणे
लोकांच्या विशेष आकर्षण ठरली. निसर्गाच्या सानिध्यात आणि पावसाळी वातावरणाने या
‘विश्वरंगा’ मध्ये आणखी रंग भरले होते. काही आजी आजोबा आपल्या नातवंडासमवेत चित्र
काढत होते तर काही आई वडील आपल्या मुलांना वेगवेगळ्या निसर्गरम्य ठिकाणी नेऊन
मुलांना चित्र काढण्यास प्रोत्साहन देत होते. जवळील काही कंपन्यामधील कर्मचारी सुद्धा या
स्पर्धेमध्ये सहभागी झाले होते तर कॉलेज मध्ये जाणारे विद्यार्थीसुद्धा ग्रुपनेच या स्पर्धेचा
आनंद लुटत होते. तसेच काही व्यावसायिक चित्रकार अगदी गंभीरपणे परंतु आनंदात मग्न
होऊन चित्र काढताना दिसत होते. ज्येष्ठ नागरिकांनी देखील यात उत्स्फुर्तपणे सहभाग घेतला होता. या
कार्यक्रमामुळे खूप वर्षानी आमच्यातला कलाकार पुन्हा समोर आला अशी प्रतिक्रिया त्यांनी यावेळी दिली.
या स्पर्धेचा निकाल ४ ऑक्टोबर रोजी असून त्याचवेळी बक्षिस समारंभ असणार आहे.३ व ४
ऑक्टोबर रोजी ‘डीएसके स्कूल’ येथे स्पर्धेमध्ये काढण्यात आलेलीचित्रे व फोटोंच्या प्रदर्शनाचे
आयोजनही यावेळी करण्यात येणार आहे.