पुणे – महिलांच्या कल्पकतेला व सुप्त कलागुणांना वाव देण्यासाठी ज्योती कुलकर्णी रिसर्च फाऊंडेशनतर्फे रविवारी (दि. १९) पुष्प रचना स्पर्धा आयोजित करण्यात आली आहे.
म्हात्रे पुलाजवळील घरकुल लॉन्स येथे सकाळी नऊ ते अकरा या वेळेत ही स्पर्धा घेतली जाणार आहे. स्पर्धेतील सहभागी स्पर्धकांची कलाकृती सर्वांना पाहण्याची संधी मिळावी, या उद्देशाने पुष्प रचनांचे प्रदर्शनही आयोजित केले आहे. प्रसिद्ध अभिनेत्री व श्रीराम लागू यांच्या पत्नी दीपा लागू यांच्या हस्ते या प्रदर्शनाचे उद्घाटन होणार आहे, अशी माहिती फाऊंडेशनच्या विश्वस्त भाग्यश्री कुलकर्णी यांनी पत्रकाद्वारे दिली आहे.
कुलकर्णी यांनी सांगितले की, या स्पर्धेतील पहिल्या तीन विजेतींना अनुक्रमे १५ हजार, १० हजार व ५ हजार रूपये रोख व प्रमाणपत्र देऊन गौरविण्यात येणार आहे. ही स्पर्धा विनामूल्य असून १८ वर्षाच्या पुढील कोणत्याही वयोगटातील महिला यात भाग घेऊ शकतात. स्पर्धेत भाग घेऊ इच्छिणार्यांसाठी १८ ऑक्टोबरपर्यंत नावनोंदणीची मुदत आहे.
स्व. सौ. ज्योती कुलकर्णी यांच्या स्मरणार्थ ज्योती कुलकर्णी रिसर्च फाऊंडेशनची स्थापना करण्यात आली आहे. ज्योती कुलकर्णी स्वत: हरहुन्नरी तर होत्याच परंतु, समाजातील इतर महिलांनाही विविध संधी देण्यासाठी त्यांनी परिश्रम घेतले होते. त्यांच्या कार्याला पुढे नेण्यासाठी आम्ही ही फाऊंडेशनची स्थापना केली आहे.
महिलांच्या सुप्त कलागुणांना चालना देऊन सौंदर्यपूर्ण व सुवासिक निर्मिती त्यांच्या हातून घडावी हा या स्पर्धेमागील हेतू आहे. तरी जास्तीत जास्त महिलांनी यात सहभाग घ्यावा, तसेच इच्छुकांनी, ७७६७८०७९७९ या भ्रमणध्वनी अथवा ०२०-६६०४७१०० या दूरध्वनी क्रमांकावर संपर्क साधावा, असे आवाहन कुलकर्णी यांनी केले आहे.