पुणे:
पुणे-मुंबई महामार्गावर रात्री नुकत्याच झालेल्या एस.टी. बसला झालेल्या अपघातानंतर “महाराष्ट्र मेडिकल इमर्जन्सी सर्व्हिसेस’च्या “डायल 108′ रूग्णवाहिकांनी जखमींवर उपचार करण्याचे काम केले.
घाटात दस्तुरीजवळ एस. टी. बस उलटल्यावर 15 प्रवाशांना जखमा झाल्या होत्या. एमईएमएसच्या “डायल 108’च्या 2 सुसज्ज रूग्णवाहिका ताबडतोब घटनास्थळी पोहोचल्या. खंडाळा प्राथमिक आरोग्य केंद्र रूग्णालय व कार्ला प्राथमिक आरोग्य केंद्र येथील रूग्णवाहिकांनी मदतकार्याच्या घटनास्थळी पोहोचून जखमींसाठी उपचार मदतकार्य तातडीने सुरू केले. रूग्णवाहिकांनी 7 जखमी रूग्णांवर प्राथमिक उपचार करून नजिकच्या रूग्णालयात दाखल केले.
“26 जानेवारी 2014 रोजी सुरू झालेल्या या अत्याधुनिक वैद्यकीय सेवेसाठी 108 या दूरध्वनी क्रमांकावर डायल केल्यास सुसज्ज रुग्णवाहिका डॉक्टरांसह येते. 108 डायल वातानुकुलित विनामूल्य सेवा रूग्णवाहिकांमध्ये प्राण वाचविण्यासाठी व्हेंटीलेटरसहित सर्व अत्याधुनिक वैद्यकीय साधने आहेत. या सेवेचे मुख्य संचालन केंद्र व “रिस्पॉन्स सेंटर’ औंध उरो रुग्णालय (पुणे) येथे आहे. दुर्घटनास्थळी बचाव कार्य पुर्ण होईपर्यंत रूग्णवाहिका 24 तास कार्यरत राहतील’ असे “बी.व्ही.जी. इंडिया’चे अध्यक्ष एच.आर. गायकवाड यांनी सांगितले.