पालखी सोहळ्यानिमित्त शहर, उपनगराबरोबरच गावोगावाहून आळंदी आणि देहू येथे भाविकांची गर्दी होते. त्यामुळे पीएमपीकडून दरवर्षी जादा बसेसचे नियोजन करण्यात येते. यंदाही आळंदीसाठी स्वारगेट, मनपा भवन, हडपसर, पुणे स्टेशन, निगडी, भोसरी, हिंजवडी, चिंचवड, पिंपरीरोड येथून बसेस सोडण्यात येणार आहेत. नऊ जुलैपर्यंत नियमित आणि जादा अशा एकूण 65 बसेस मार्गावर धावतील. तर देहूसाठी पुणे स्टेशन, मनपा बवन, निगडी या ठिकाणावरून जादा आणि नियमित मिळून वीस बसेस उपलब्ध करून देण्यात आल्या आहेत. याशिवाय दहा जुलै रोजी पालखी प्रस्थान आळंदी येथून होणार असल्यामुळे पहाटे तीनपासून स्वारगेट, पुणे स्टेशन, हडपसर, मनपा भवन येथून जादा 32 बसेसची व्यवस्था करण्यात आली आहे. नियमित संचलनात असणाऱ्या बसेस या सकाळी साडे पाचपासून पुणे आणि पिंपरी-चिंचवड परिसरातील बसस्थकावरून मार्गस्थ होणार आहे.
पालखीदरम्यान बोपदेव घाटमार्गे वाहतूक
पालखीच्या हडपसर मुक्कामावेळी महात्मा गांधी स्थानक येथून पुणे स्टेशन, वारजे-माळवाडी, कोथरूड डेपो, निगडी, चिंचवड आणि आळंदी या ठिकाणी जाण्यासाठी बस व्यवस्था करण्यात आली आहे. कात्रज-कोंढव्याकडे जाण्यासाठी शिवरकर गार्डन येथून आणि मुंढवा, चंदननगर तसेच वाघोलीसाठी मगरपट्टा येथून बससेवा उपलब्ध करून देण्यात येणार आहे. तर पालखी दरम्यान दिवे घाट बंद राहणार असल्यामुळे दिवेघाटाऐवजी बोपदेव घाटमार्गे वाहतूक सुरु ठेवण्यात येणार आहे. स्वारगेट, पुणे स्टेशन, हडपसर येथून साठ जादा बसेसचे नियोजन करण्यात आल्याची माहिती पीएमपी प्रशासनाकडून देण्यात आली.