‘स्वदेशातून विदेशाकडे’ संकल्पनेवर विद्यार्थ्यांनी बनविलेल्या १००० हून अधिक वस्तूंच्या हस्तकलेचे प्रदर्शन

प्रा. रेणुका घोसपुरकर म्हणाल्या, “संस्थेचे संस्थापक अध्यक्ष प्रा. डॉ. संजय चोरडिया यांच्या मार्गदर्शनाखाली फॅशन टेक्नॉलॉजीच्या विद्यार्थ्यांनी अभ्यासक्रमांतर्गत बनवलेल्या नाविन्यपूर्ण वस्तूंच्या प्रदर्शनाचे दरवर्षी आयोजन केले जाते. महात्मा गांधीजींची १५० वी जयंती असल्याने ‘एसआयएफटी’च्या विद्यार्थ्यांनी यावर्षी खादीचा प्रचार आणि प्रसार व्हावा, तसेच खादीचे महत्व सर्वांपर्यंत पोहचावे यासाठी खादी संकल्पनेवर आधारित विविध वस्तू तयार केल्या आहेत. गांधीजींना अभिवादन करण्यासाठी प्रदर्शनस्थळी महात्मा गांधी चरख्यावर सूत कातत असतानाची प्रतिकृती उभारण्यात येणार आहे. जवळपास १००० वस्तू या प्रदर्शनात मांडण्यात येणार आहेत. या वस्तू माफक दरामध्ये खरेदी करता येणार आहेत. देशभरात तसेच जागतिक स्तरावर खादीच्या कपड्यांचे पुनरुज्जीवन करण्याच्या उद्देशाने हाताने तयार केलेल्या आणि हाताने विणलेल्या कपड्यांना प्रोत्साहन देण्यासाठी सूर्यदत्तानी पुढाकार घेतला आहे. विद्यार्थ्यांनी या वस्तू बनवताना पर्यावरणपूरकतेलाही प्राधान्य दिले आहे. अनेक छोट्या तुकड्याचा पुनर्वापर करून लक्षवेधक वस्तू बनवल्या आहेत.” खादी हे फक्त कापड नसून, तो एक विचार आहे. महाविद्यालयीन विद्यार्थ्यांनी हा विचार आपल्या आचरणात आणावा. खादीमधील सूताप्रमाणे पर्यावरण, व्यवस्था आणि समाजातील धागे विणून राष्ट्राची बांधणी करण्यात युवकांनी योगदान द्यावे, हा या प्रदर्शनाच्या आयोजनामागील उद्देश आहे.

डॉ. संजय चोरडिया म्हणाले, “विसाव्या शतकाच्या पहिल्या दोन दशकांत महात्मा गांधींनी खादीची चळवळ राबवली. त्यातून विदेश वस्तूंच्या वापराबाबत बहिष्कार घातला आणि स्वदेशी वस्तुंना, तसेच स्थानिक कारागिरांना प्रोत्साहन दिले. गावातील छोट्या व्यावसायिकांना दिलासा देण्यासाठी, तसेच महागड्या विदेशी कपड्यांवर बहिष्कार घालण्यासाठी ही चळवळ उपयुक्त ठरली होती. ब्रिटिशांच्या विरोधात महात्मा गांधीजींनी खादी आणि असहकार चळवळ यशस्वीपणे राबवली. त्यांच्या १५० व्या जयंतीच्या निमित्ताने पुन्हा एकदा खादीला प्रोत्साहन देऊन स्वदेशी वस्तूंचा वापर वाढावा, तसेच स्थानिक कलाकार, कारागीर आणि उद्योजकांना प्रोत्साहन देण्याच्या उद्देशाने हे प्रदर्शन महत्वाचे ठरणार आहे. तसेच विद्यार्थ्यांमध्ये देशभक्तीची भावना रुजविण्याचा, थोर व्यक्ती, स्वातंत्र्यसेनानी यांची ओळख करून देण्यासाठी हा एक अनोखा उपक्रम राबविला जात आहे. डिझाइन उद्योगात भविष्यात नेतृत्व करण्यासाठी फॅशन डिझायनर्सची एक प्रतिभावान कार्यक्षम विदयार्थी तयार करण्यासाठी ‘एसआयएफटी’च्या वतीने या प्रदर्शनाच्या माध्यमातून संधी दिली जाते. ‘एसआयएफटी’मध्ये विद्यार्थ्यांना व्यावसायिक आणि फॅशन डिझाईन प्रशिक्षणासाठी उत्कृष्ट सुविधा पुरवते. फॅशन टेक्नॉलॉजीचे अभ्यासक्रमात फॅशनच्या प्रमुख क्षेत्रांमध्ये ज्ञान आणि व्यावहारिक प्रदर्शनाचे उद्दीष्ट ठेऊन विद्यर्थ्यांना मार्गदर्शन केले जाते. तसेच त्यांना रोजगाराच्या विविध संधी देखील देण्यात येतात. विद्यर्थ्यांना या विषयातील संपूर्ण ज्ञान मिळावे यासाठी फॅशन डिझायनिंगच्या क्षेत्रात डिप्लोमा, पदवी आणि अल्प कालावधीचे अभ्यासक्रम उपलब्ध करून दिले आहेत. हे प्रदर्शन सर्वांसाठी विनामूल्य खुले असून, अधिकाधिक लोकांनी त्याचा लाभ घ्यावा.”

शिक्षण क्षेत्रात काळानुरुप होत असलेले बदल आणि त्याची गरज लक्षात घेऊन सुर्यदत्ता ग्रुप ऑफ इन्स्टिट्यूटमध्ये त्यानुसार नाविण्यपूर्ण, उपयुक्त शिक्षण देण्याचा प्रयत्न केला जातो. झपाट्याने विकसित होत असलेल्या भारतात फॅशन जगतात आज सर्जनशील नोकर्‍यांची संधी मोठ्या प्रमाणात उपलब्ध आहे. या संधींचा लाभ उठविण्यासाठी आणि नव्या पर्यायांकडे वळण्यासाठी सुर्यदत्ता ग्रुपमध्ये संशोधनासाठी नेहमीच प्रोत्साहित केले जाते. त्यांच्यामध्ये मानवता, स्वातंत्र्य, प्रामाणिकपणा, जबाबदारी आणि संवेदनशील भावनेने काम करण्यास प्रवृत्त केले जाते. नवीन कल्पना आणि उद्यमशीलतेला प्रोत्साहन देण्यासह राष्ट्रीय व आंतरराष्ट्रीय पातळीवर स्वत:ची ओळख निर्माण करण्यासाठी विद्यार्थ्यांना प्रेरित करण्याचे काम संस्थेत होते. सगळ्यांचा आदर ठेवला जातो. फॅशन क्षेत्रातील विविध करिअरच्या संधी ओळखून त्यानुसार इथे मुलांना शिकवले जाते. ‘एसआयएफटी’ सावित्रीबाई फुले पुणे विद्यापीठाशी संलग्नित असून, पदवी आणि विविध प्रमाणपत्र अभ्यासक्रम उपलब्ध करुन देण्यात आले आहेत. बीएस्सी (फॅशन डिझाईन) ही पदवी लक्झरी इन मॅनेजमेंट अ‍ॅन्ड फॅशन मॅनेजमेंट या प्रमाणपत्रासह दिली जाते.