अपना घर ड्रीमझ’ कर्ज योजनेत 2 लाख ते 30 लाखांपर्यंतचे कर्जवितरण
पुणे, 16 सप्टेंबर, 2020: आयसीआयसीआय होम फायनान्स (आयसीआयसीआय एचएफसी) या कंपनीने सुतार, प्लंबर, इलेक्ट्रीशियन, शिंपी, पेंटर, वेल्डर, ऑटो मॅकेनिक, उत्पादन क्षेत्रातील यंत्रांवरील ऑपरेटर (उदा. लेथ, सीएनसी), तसेच लॅपटॉप, संगणक, आरओ यांची दुरुस्ती करणारे तंत्रज्ञ, त्याचप्रमाणे लघु व मध्यम व्यवसायांचे मालक, किराणा दुकानदार आदी शहरातील कुशल व्यावसायिकांसाठी ‘अपना घर ड्रीमझ’ ही नवीन सूक्ष्म गृहकर्ज योजना सुरू केली आहे. या योजनेत कर्जाऊ रक्कम 2 ते 30 लाखांपर्यंतची आहे. ज्यांना स्वतःचे घर विकत घ्यायचे आहे; परंतु औपचारिक वित्तीय संस्थांकडे सादर करावयाची आवश्यक कागदपत्रे असू शकत नाहीत, अशा असंघटीत क्षेत्रातील कामगारांसाठी ‘अपना घर ड्रीमझ’ गृहकर्ज ही योजना खास काढण्यात आली आहे.
‘अपना घर ड्रीमझ’ गृहकर्ज योजनेचा लाभ घेऊ इच्छिणाऱ्या ग्राहकांना त्यांचे पॅन कार्ड, आधार कार्ड, मागील सहा महिन्यांचे बँक स्टेटमेंट ही कागदपत्रे द्यावी लागतील, तसेच 5 लाखांपर्यंतच्या कर्जासाठी 1500 रु. आणि 5 लाखांपुढील कर्जासाठी 3000 रु. इतकी रक्कम आपल्या खात्यात किमान शिल्लक स्वरुपात राखावी लागेल. रहिवासी आपल्या जवळच्या ‘आयसीआयसीआय होम फायनान्स कंपनी’च्या शाखेत जाऊन खास 20 वर्षांच्या मुदतीच्या सूक्ष्म गृहकर्जाचा लाभ घेऊ शकतील. पुण्यात कंपनीच्या शाखा शिवाजीनगर येथे, 1187/22, व्यंकटेश मेहेर, दुसरा मजला, घोले रोड, पुणे – 411005 आणि वाकड येथे कार्यालय क्र. 101, पहिला मजला, फॉर्च्यून बिझिनेस सेंटर, अॅम्बियन्स हॉटेल जवळ, कस्पटे वस्ती, वाकड, पुणे – 411057 येथे आहेत.
‘आयसीआयसीआय होम फायनान्स कंपनी लिमिटेड’चे व्यवस्थापकीय संचालक आणि मुख्य कार्यकारी अधिकारी अनिरुद्ध कामानी म्हणाले, “’आयसीआयसीआय होम फायनान्स’मध्ये आम्ही अर्थव्यवस्थेतील असंघटीत क्षेत्रातील कष्टकऱ्यांचे व स्थानिक व्यावसायिकांचे अपना घर असण्याचे स्वप्न पूर्ण करण्यासाठी कर्ज देण्याचे उद्दिष्ट ठेवले आहे. आमच्या शाखांमधील कर्मचारी हे स्थानिक रहिवासी असल्यामुळे त्यांना प्रादेशिक अर्थव्यवस्थेचे आकलन असते. त्यामुळेच आमचे अंतर्गत कायदेतज्ज्ञ व तांत्रिक अधिकारी हे गृहकर्जांच्या अर्जांवर जलद गतीने, विनाअडथळा व किमान कागदपत्रांनिशी प्रक्रिया करण्यास मदत करू शकतात.”
या गृहकर्ज योजनेचा लाभ घेणारे ग्राहक ‘प्रधानमंत्री आवास’ योजनेचे (पीएमएवाय) सर्व लाभ मिळवू शकतात. यामध्ये अल्प उत्पन्न गट / आर्थिकदृष्ट्या दुर्बल विभाग (ईडब्ल्यूएस / एलआयजी) आणि मध्यम उत्पन्न गट (एमआयजी – I आणि II) यांच्यासाठी ‘क्रेडिट-सबसिडी’ योजना (सीएलएसएस) उपलब्ध आहे. ‘पीएमएवाय – सीएलएसएस’ अंतर्गत, कर्जदार 2.67 लाख रुपयांच्या कमाल अनुदानास पात्र आहेत.
केंद्रिय गृह मंत्रालय व केंद्रिय आरोग्य व कुटुंबकल्याण मंत्रालय यांच्यातर्फे देण्यात आलेल्या ‘कोविड-19’पासून सुरक्षिततेच्या सर्व सूचनांचे काटेकोर पालन ‘आयसीआयसीआय एचएफसीचे’ कर्मचारी व ग्राहक यांच्यासाठी करण्यात येते. शाखेत प्रवेश करण्यापूर्वी सर्व अभ्यागतांचे व कर्मचार्यांचे तपमान तपासणे, सुरक्षित अंतर सुनिश्चित करणे, शाखांचे सॅनिटायझेशन करणे, जागोजागी हॅंड सॅनिटायझर्स ठेवणे आणि प्रत्येकास फेस मास्क घालण्यास अनिवार्य करणे, ही शिस्त कंपनीच्या प्रत्येक शाखेत पाळली जाते. कंपनीच्या कर्मचाऱ्यांपैकी कोणास संसर्ग झाल्याचा संशय आल्यास, त्याला आरोग्य तपासणी करायला लावून निष्कर्ष येईपर्यंत विलग करण्यात येते, तसेच विलगीकरणासाठी / हॉस्पिटलायझेशनसाठी सर्व प्रकारची मदत करण्यात येते. कोरोनाचा प्रसार रोखण्यासाठी ‘कॉन्टॅक्ट-ट्रेसिंग’ही केले जाते.
‘आयसीआयसीआय होम फायनान्स’बद्दल
आयसीआयसीआय होम फायनान्स (आयसीआयसीआय एचएफसी) ही ‘नॅशनल हाउसिंग बँके’मध्ये (एनएचबी) नोंदणी असलेली हाउसिंग फायनान्स कंपनी आहे. 65 वर्षे जुन्या आयसीआयसीआय समुहाचा ती एक भाग असून ‘आयसीआयसीआय बँक लिमिटेड’च्या संपूर्ण मालकीची उपकंपनी आहे. कोट्यवधी भारतीयांचे नवीन घर मिळवण्याचे स्वप्न साकार करण्याचे ‘आयसीआयसीआय होम फायनान्स’चे उद्दिष्ट आहे. गृहकर्जे आणि गृह सुधार कर्जे, कार्यालयीन कर्ज, सामान्य ग्राहकांना होम इक्विटी कर्जे आणि विकसकांना बांधकाम कर्जे वितरीत करणे हा या कंपनीचा प्राथमिक व्यवसाय आहे. या कर्जांशी संबंधित घरे व व्यावसायिक मालमत्तांचा शोध घेण्याची सेवाही कंपनी देऊ करते. आज, कंपनीकडे 1800 हून अधिक कर्मचारी आहेत, तसेच देशभरात 15 विभागीय कार्यालयांसह 139 स्वतंत्र शाखा आहेत.