बारामती: बारामती विधानसभा मतदारसंघातील मतदान केंद्रांवर नियुक्त केंद्राध्यक्ष, सहाय्यक केंद्राध्यक्ष व इतर सहायक कर्मचाऱ्यांना ईव्हीएम हाताळणी आणि निवडणूक प्रक्रियेविषयी प्रशिक्षण देण्यात आले.

माळेगाव येथील अभियांत्रिकी महाविद्यालयात आयोजित दोन दिवसीय प्रशिक्षणाला सहाय्यक निवडणूक निर्णय अधिकारी वैभव नावडकर, तहसीलदार गणेश शिंदे, नायब तहसीलदार तुषार गुंजवटे आदी उपस्थित होते.

प्रशिक्षणात श्री.नावडकर यांनी मतदानाची प्रक्रिया, ईव्हीएम यंत्र हाताळणी, ईव्हीएम यंत्रांची वाहतूक, मतदान केद्रांची रचना, केंद्रावरील सुरक्षाव्यवस्था, अभिरुप मतदान, ईडीसी मतदान प्रक्रिया, दिव्यांग मतदारांचे मतदान, मतदान केंद्राध्यक्षाने करावयाचे अहवाल, निवडणुकी विषयक कागदपत्रे आदीबाबत सादरीकरणाद्वारे माहिती दिली.

लोकसभा सार्वत्रिक निवडणुकीच्या कामकाजाकरीता नियुक्त अधिकारी व कर्मचाऱ्यांना आपली जबाबदारी चोखपणे पार पाडून निवडणूक प्रक्रिया यशस्वी करावी, अशा त्यांनी दिल्या.

दोन दिवसीय प्रशिक्षण सत्रात एकूण २ हजार ६०० अधिकारी व कर्मचाऱ्यांना  प्रशिक्षण देण्यात येणार असून त्यापैकी आज पहिल्या दिवशी १ हजार ३०० अधिकारी व कर्मचाऱ्यांना  प्रशिक्षण देण्यात आले.

ईव्हीएम, व्हीव्हीपॅट यंत्राची जोडणी, हाताळणी, यंत्र चालू व बंद करणे तसेच सील करणे याबाबतचे प्रत्यक्ष प्रात्यक्षिक सहायक निवडणूक अधिकारी तहसीलदार श्री. शिंदे यांच्या मार्गदर्शनाखाली देण्यात आले.

विविध रथांसह, मर्दानी खेळ व ग्रामगुढीचा समावेश
पुणे : गुढीपाडव्यानिमित्त हिंदू नववर्ष स्वागत समितीतर्फे शहराच्या मध्यभागात मंगळवार, दिनांक ९ एप्रिल रोजी भव्य शोभायात्रेचे आयोजन  करण्यात आले आहे. महात्मा फुले मंडईतील लोकमान्य टिळक पुतळ्यापासून सकाळी ८.३० वाजता शोभायात्रेला प्रारंभ होणार आहे. यामध्ये पारंपरिक वेशात हजारो पुणेकर सहभागी होणार आहेत, अशी माहिती समितीचे संयोजक राघवेंद्र मानकर व सहसंयोजक अश्विन देवळणकर यांनी दिली. 
लोकमान्य टिळक पुतळ्यापासून शोभायात्रेला प्रारंभ होणार असून तुळशीबाग राम मंदिर, शनिपार, अप्पा बळवंत चौक मार्गे तांबडी जोगेश्वरी मंदिर येथे समारोप होणार आहे. यावेळी रा.स्व.संघाचे पुणे महानगर कार्यवाह सचिन भोसले उपस्थित राहणार आहेत. छत्रपती शिवाजी महाराजांच्या सरदारांच्या घराण्यातील वंशजांच्या हस्ते गुढी उभारण्यात येणार आहे. 
प्रबोधन मंच रथ, भजनी मंडळ, पद्मश्री पुरस्कार मिळालेल्या विविध महिलांवर आधारित मातृशक्ती रथ, प्रभू श्रीराम रथ, छत्रपती शिवाजी महाराज रथ, ढोल-ताशा पथक, शंख पथक, बँड, मर्दानी खेळ, वेत्रचर्म पथक देखील सहभागी होणार आहेत. मतदानाचे महत्व पटवून देत मतदान जनजागृतीकरिता विशेष रथ देखील शोभायात्रेत सहभागी होणार आहे.  
याशिवाय विविध भजनी मंडळे, अध्यात्मिक समूह, सनातन धर्माभिमानी मंडळी, प्रभू राम-लक्ष्मण-सीता हनुमान यांच्या मूर्ती, पारंपरिक वेषभूषा आणि ऐतिहासिक, अध्यात्मिक, स्वातंत्र्यलढ्यातील थोर व्यक्ती इत्यादींचा आदर्श ठेवून केलेल्या वेशभूषेतील नागरिक मोठ्या संख्येत सहभागी होतील. पुणेकरांनी देखील भगव्या टोप्या, भगवे फेटे घालून, धर्मध्वज (भगवा) हातात घेऊन मोठ्या संख्येने सहभागी व्हावे, असे आवाहन करण्यात आले आहे.

पुणे, दि. ६ : लोकसभा सार्वत्रिक निवडणूकीच्या कामकाजासाठी नियुक्त केलेल्या प्रत्येक अधिकारी, कर्मचाऱ्यांनी निवडणूक प्रक्रियेचे महत्व लक्षात घेवून विहित पद्धतीने कर्तव्य पूर्ण करावे, असे निर्देश जिल्हाधिकारी डॉ. सुहास दिवसे यांनी दिले.

पुणे कँटोन्मेंट विधानसभा मतदारसंघाच्यावतीने गंज पेठेतील सावित्रीबाई फुले सभागृहात आयोजित प्रथम निवडणूक कर्मचाऱ्यांच्या दुसऱ्या प्रशिक्षण सत्रास भेटीप्रसंगी ते बोलत होते. यावेळी उपजिल्हाधिकारी अनिल पवार, पुणे कँटोन्मेंट विधानसभा मतदारसंघाचे सहायक निवडणूक अधिकारी सिद्धार्थ भंडारे, तहसीलदार ज्योती देवरे, निवडणूक नायब तहसीलदार चित्रा ननावरे आदी उपस्थित होते.

मतदानाची कार्यपद्धती सांगून जिल्हाधिकारी डॉ. दिवसे म्हणाले, सर्वसमावेशक आणि सर्वांना सोयीची होईल अशी निवडणूक घेण्यासाठी जिल्ह्याची तयारी पूर्ण झाली आहे. मतदान हा त्यातील महत्वाचा भाग आहे. दिव्यांग व ज्येष्ठ नागरिकांसाठी मतदानाच्यावेळी रांगेत उभे न राहता त्वरीत सर्व सोयी सुविधा उपलब्ध करून द्याव्यात. निवडणूक कर्तव्यासाठी नेमलेल्या अधिकाऱ्यांनी कायदेशीर प्रक्रिया, माहिती पुस्तीका याचे अवलोकन करून कामकाज पहावे.

कर्मचाऱ्यांना ईव्हीएम यंत्राबाबत प्रत्यक्ष प्रात्यक्षिकाद्वारे माहिती द्यावी. हेतूपुरस्सर निवडणूक कामकाजाकडे दुलर्क्ष करणे, वेळ न पाळणे अशी बाब आढळल्यास कठोर कायदेशीर कारवाई करण्यात येईल. मतदान केंद्रवर स्वच्छतागृह, पिण्याचे पाणी, रॅम्प अशा सुविधा पुरविण्यात याव्यात, अशा सूचनाही त्यांनी यावेळी केल्या.

श्री. भंडारे म्हणाले, निवडणूक प्रक्रिया हा लोकशाहीचा सोहळा आहे. या कामामध्ये न्युनगंड न बाळगता प्रत्येकाने मनापासून सहभागी व्हावे. सर्वांनी मतदान प्रक्रिया समजून घेणे आवश्यक आहे. ईव्हीएम यंत्र हाताळण्याचे प्रात्याक्षिक प्रत्येकाने करावे, अशा सूचनाही त्यांनी दिल्या.

यावेळी तीन प्रशिक्षण सत्राचे आयोजन करण्यात आले. प्रशिक्षणामध्ये ईव्हीएम यंत्र हाताळणे, दिव्यांग व ज्येष्ठ नागरिक मतदारांसाठी करावयाची कार्यवाही, ईव्हीएमची वाहतूक, मतदान केद्रांची रचना, केंद्रावरील सुरक्षाव्यवस्था, निवडणुकीच्या दिवशी मतदान सुरू होण्यापूर्वी करण्यात येणारे अभिरूप मतदान, मतदानाच्यावेळी तांत्रिक बिघाड निर्माण झाल्यास करावयाच्या उपायोजनांबाबतही माहिती देण्यात आली. मतदानाच्यावेळी निवडणूक आयोगांच्या सूचनांबाबतही यावेळी सादरीकरणाद्वारे माहिती देण्यात आली. तहसीलदार श्रीमती देवरे यांनी मतदान प्रक्रियेविषयी मार्गदर्शन केले.

पुणे :किरकोळ कारणावरुन शेजारी राहणाऱ्या गर्भवती महिलेला लाथाबुक्क्यांनी बेदम मारहाण केली. या मारहाणीत महिलेच्या पोटात असलेल्या अर्भकाचा मृत्यू झाल्याची धक्कादायक घटना मंगळवार पेठेत घडली आहे. ही घटना 27 मार्च रोजी रात्री एक वाजण्याच्या सुमारास घडली आहे. अर्भकाचा मृत्यू झाल्यानंतर संतप्त नातेवाईकांनी समर्थ पोलीस ठाण्यात धाव घेऊन आरोपीवर कारवाईची मागणी केली. पोलिसांनी चार जणांवर गुन्हा दाखल करुन एकाला अटक केली आहे.फरार आरोपी पैकी एकाचे राजकीय संबंध असल्याने त्यांना आसरा मिळत असल्याचा आरोप काही कार्यकर्त्यांनी येथे केला आहे.

याबाबत राजू माधवराव चिद्रावार (वय 25, रा. दुसरा मजला, यार खान कॉम्प्लेक्स, मंगळवार पेठ) यांनी गुरुवारी (दि.4 एप्रिल) समर्थ पोलीस ठाण्यात फिर्याद दिली आहे. यावरुन पोलिसांनी नवाज नासिर खान (वय 27, रा. चौथा मजला, यार खान कॉम्प्लेक्स, मंगळवार पेठ) याला अटक केली आहे. तर त्याच्यासोबत असलेल्या रफीया खान, नासिर खान आणि सलमान उर्फ टिपू शेख (सर्व रा. मंगळवार पेठ) यांच्यावर आयपीसी 316, 323, 504, 506, 427, 34 नुसार गुन्हा दाखल करण्यात आला आहे.

पोलिसांनी दिलेल्या माहितीनुसार, आरोपी नवाज खान याने 27 मार्च रोजी फिर्यादी यांच्या घराच्या दरवाजावर लाथ मारली. याचा जाब विचारण्यासाठी फिर्य़ादी, त्यांची पत्नी मिरा व पत्नीचा मानलेला भाऊ गणेश कांबळे हे गेले होते. त्यावेळी आरोपी नवाज खान, त्याची आई रफिया खान, नासीर खान यांनी फिर्यादी यांच्या पत्नीला शिवीगाळ करुन लाथाबुक्क्यांनी मारहाण केली.

मिरा चिद्रावार या गरोदर असल्याची माहिती आरोपींना माहित होती. तरी देखील आरोपींनी मिरा यांच्या पोटात लाथा मारून मारहाण केली. पोटावर लाथा मारल्याने अर्भकाचा मृत्यू होऊ शकतो हे माहित असताना देखील आरोपींनी जाणीवपूर्वक मारहाण केल्याचे फिर्यादीत नमूद केले आहे. तसेच नवाज खान याने फिर्यादी यांच्या ज्युपीटर गाडीवर दगड मारुन नुकसान केले. तर सलमान उर्फ टिपू शेख याने फिर्य़ादी यांना फोन करुन पोलिसांकडे तक्रार केली तर तुला जीवे ठार मारीन अशी धमकी दिली.या सलमान चे काही राजकीय संबध असल्याचा आरोप कार्यकर्त्यांनी केला आहे. त्यामुळे त्यांना आसरा मिळत असल्याचे त्यांचे म्हणणे आहे .

दरम्यान, आरोपींनी केलेल्या मारहाणीमुळे मिरा यांना त्रास होऊ लागल्याने त्यांना तातडीने भारती विद्यापीठ रुग्णालयात उपाचारासाठी दाखल करण्यात आले.उपचार सुरु असताना मिरा यांच्या पोटातील अर्भकाचा मृत्यू झाला.बाळाचा मृत्यू झाल्याचे समजल्यानंतर मिरा यांच्या नातेवाईकांनी व सामाजिक कार्य़कर्त्यांनी समर्थ पोलीस ठाण्यात धाव घेत आरोपींवर कारवाई करण्याची मागणी केली.पोलिसांनी चार जणांवर गुन्हा दाखल करुन एकाला अटक केली आहे.

घटनेची माहिती मिळताच पोलीस उपायुक्त परिमंडळ-2 स्मार्तना पाटील ,सहायक पोलीस आयुक्त, फरासखाना विभाग रुक्मिणी गलांडे ,वरिष्ठ पोलीस निरीक्षक मारुती पाटील , पोलीस निरीक्षक (गुन्हे) निलेश बडाख,पोलीस उपनिरीक्षक सुहास पाटील यांनी घटनास्थळी धाव घेतली.गुन्ह्याचा पुढील तपास पोलीस निरीक्षक (गुन्हे) निलेश बडाख करीत आहेत.

पुणे-दि. ६- जुन्नर विधानसभा मतदारसंघातील आदिवासी भागात मतदान विषयक जनजागृती उपक्रम राबवितांना ग्रामस्थांना सेल्फीच्या माध्यमातून मतदान करण्याची शपथ घेण्याचे आवाहन विद्यार्थ्यांनी केले. धावशी या डोंगरावर वसलेल्या दुर्गम भागातील गावातही विद्यार्थ्यांनी उत्साहाने मतदार जागृती उपक्रमात सहभाग घेतला.

मतदान जनजागृतीसाठी शालेय विद्यार्थ्यांनी अनोखी कल्पना शोधून काढली. त्यांनी शिक्षकांच्या मार्गदर्शनाखाली सेल्फीसाठी मतदानाचे महत्व असणारा संदेश लिहिलेली चौकट तयार केली. जनजागृती फेरीदरम्यान भेटणाऱ्या प्रत्येकाला त्यांनी ही चौकट हातात घेवून छायाचित्र घेण्यास सांगितले आणि मतदान करण्याची शपथ घेण्याचे आवाहन केले. गावातील तरुण, वृद्ध, महिला सर्वांनीच या उपक्रमाला प्रतिसाद देत मतदान करणार असल्याचे सांगितले.

स्वीप समन्वयक अनिता शिंदे आणि माध्यम कक्ष समन्वयक संजय जाधव, सहाय्यक समन्वयक बाळासाहेब भालेकर यांच्या मार्गदर्शनाखाली मढ, कोपरे,मुथाळणे, बांगर वाडी, सितेवाडी, धावशी, साबरवाडी, वसईवाडी येथे जनजागृती कार्यक्रम घेण्यात आला. यावेळी मतदान हा आपला अधिकार असल्याचा संदेश देत आगामी लोकसभा निवडणुकीत मतदान करण्याचे आवाहन करण्यात आले. कार्यक्रमात स्वीप समन्वयक ,गटशिक्षणाधिकारी, विस्तार अधिकारी, केंद्रप्रमुख, शिक्षक उपस्थित होते.

महाविद्यालयातील विद्यार्थ्यांनी केला मतदानाचा संकल्प

खेड आळंदी विधानसभा मतदाररसंघांतर्गत हुतात्मा राजगुरू महाविद्यालयातील ९०० हून अधिक विद्यार्थ्यांकडून संकल्प पत्र भरून घेण्यात आले. विद्यार्थ्यांना मतदान प्रक्रीयेबाबत मार्गदर्शनही करण्यात आले. यावेळी विद्यार्थ्यांनी मतदानाबाबत शपथ घेतली. प्रथमच मतदान करता येणार असल्याने नवमतदारांमध्ये उत्साहाचे वातावरण होते. सोमवारी देखील हा उपक्रम राबविण्यात येणार आहे.

बँक व पोस्ट कार्यालयात मतदानाचे आवाहन

हडपसर विधानसभा मतदारसंघातील विविध बँका व पोस्ट कार्यालयात मतदान जनजागृती कार्यक्रम घेण्यात आले. मतदान हा आपला अधिकार असून आपण लोकसभा निवडणुकीत मतदानाचा हक्क बजवावा,अ से आवाहन करण्यात आले. बँक कर्मचारी आणि ग्राहकांनी उपक्रमात सहभाग घेतला. स्वीप समन्वयक अमरदीप मगदूम, पर्यवेक्षक तेजस्विनी गदादे, सहाय्यक संजीव परदेशी आदी यावेळी उपस्थित होते.

क्रांतीसूर्य महात्मा जोतीबा फुले आणि भारतरत्न डॉ. बाबासाहेब आंबेडकर जयंती समिती यांच्या वतीने आयोजन ; अयोध्येत विश्वविक्रमी शिरा बनविण्यासाठी वापरलेली भव्य कढई पहिल्यांदाच मिसळ करण्याकरिता पुण्यात आंतरराष्ट्रीय ख्यातीचे शेफ विष्णू मनोहर वापरणार
पुणे  : क्रांतीसूर्य  महात्मा जोतीबा फुले आणि भारतरत्न डॉ. बाबासाहेब आंबेडकर या दोन्ही महामानवांनी लोकसहभागातूनच मोठी क्रांती घडवली आहे. त्यांचा आदर्श डोळ्यासमोर ठेवत त्यांच्या जयंती निमित्त पुणेकरांच्या सहभागातून  तब्बल वीस हजार किलोची मिसळ बनविण्यात येणार आहे. अयोध्येत तब्बल ७ हजार किलोचा विश्वविक्रमी शिरा साकारण्याकरिता वापरलेल्या कढईत आंतरराष्ट्रीय ख्यातीचे शेफ विष्णू मनोहर २० हजार किलोची मिसळ बनविणार आहेत. 
दोन्ही महापुरुषांच्या जयंतीनिमित्ताने दिनांक ११ आणि १४ एप्रिल रोजी अनुक्रमे गंज पेठेतील  महात्मा जोतीबा फुले वाडा आणि  पुणे रेल्वे स्टेशन रस्ता येथील डॉ.बाबासाहेब आंबेडकर पुतळा येथे ही मिसळ तयार करुन अभिवादनाकरीता येणा-या बांधवांना मिसळ वाटप करण्यात येणार आहे. क्रांतीसूर्य महात्मा जोतीबा फुले आणि भारतरत्न डॉ. बाबासाहेब आंबेडकर जयंती समिती यांच्या वतीने उपक्रमाचे आयोजन करण्यात आहे, अशी माहिती संयोजन समितीतर्फे देण्यात आली. 
गुरुवार, दिनांक ११ एप्रिल २०२४ रोजी क्रांतीसूर्य महात्मा जोतीबा फुले वाडा येथे १० हजार किलो मिसळ आणि दिनांक १४ एप्रिल २०२३ रोजी सकाळी ७ पासून महामानव भारतरत्न डॉ. बाबासाहेब आंबेडकर पुतळा येथे १० हजार किलो मिसळ तयार करून वाटप करण्याच्या उपक्रमाचे आयोजन करण्यात आले आहे. 
पुणेकरांनी कोणताही नव्याने सुरु केलेला उपक्रम हा समाजातील इतरांकरीता आदर्श ठरत असतो. त्यामुळेच यंदा सलग दुस-या वर्षी आगळ्या – वेगळ्या पध्दतीने लोकसहभागातून तब्बल २० हजार किलो मिसळ तयार करण्याचा उपक्रम घेण्यात आला आहे. लोकसहभाग असला की कितीही मोठी अवघड गोष्ट ही अगदी सहज मार्गी लागते, अशी हजारो उदाहरणे स्वातंत्र्यपूर्व काळापासून ते आजपर्यंत या समाजात पहायला मिळतात. याच धर्तीवर लोकसहभागासाठी लोकांनी एकत्र येण्यासाठी या उपक्रमाचे आयोजन केले आहे.
पुण्यातील सर्वपक्षीय पदाधिकारी, सामाजिक संस्था, गणेशोत्सव मंडळांनी उपक्रमात सहभाग घेतला आहे. पुणेकरांनी महात्मा फुले वाड्यात दि. ११ एप्रिल रोजी सकाळी ७ ते रात्री ८ या वेळात आपल्या सोयीने कधीही येऊन मोफत मिसळीच्या उपक्रमाचा आस्वाद घ्यावा. मिसळ हे निमित्त आहे, एकत्र येण्याचे आणि महापुरुषांना वंदन करण्याचे. तरी सर्वांनी या उपक्रमात मोठया संख्येने सहभागी व्हावे, असे आवाहन समितीतर्फे  करण्यात आले आहे.

* २० हजार किलो मिसळ करण्याकरिता लागणार भव्य कढई व हजारो किलो साहित्य
मिसळ तयार करण्याकरिता १५ बाय १५ फूट आकारातील भव्य कढाई वापरण्यात येणार आहे. कढईची उंची ६.५ फूट असून २५०० किलो वजन आहे. पोलाद, तांबे आणि भक्कम स्टिलचा वापर करुन ही कढई साकारण्यात आली असून झाकणही मोठे आहे. अयोध्येतील विश्वविक्रमानंतर थेट पुण्यातील या उपक्रमाकरिता ही कढई वापरण्यात येणार आहे. 
उपक्रमामध्ये २० हजार किलो मिसळ बनविण्यासाठी मटकी २००० किलो, कांदा १६०० किलो, आलं ४०० किलो, लसूण ४०० किलो, तेल १४०० किलो, मिसळ मसाला २८० किलो, लाल मिरची पावडर ८० किलो, हळद पावडर ८० किलो, मीठ १०० किलो, खोबरा कीस २८० किलो, तमाल पत्र १४ किलो, फरसाण ५००० किलो, पाणी २०००० लिटर, कोथिंबीर २५०, लिंबू २००० नग जुडी इत्यादी साहित्य वापरण्यात येणार आहे. तसेच मिसळ खाण्याकरिता डिस्पोजेबल डिश १ लाख, पाणी पिण्यासाठी डिस्पोजेबल ग्लास १ लाख यांसह १००० किलो दही व स्लाईड ब्रेड ३ लाख नग असे साहित्य वापरण्यात येणार आहे.

पुणे- -एमएनजीएलने आपल्या ग्राहकांना सावधगिरीचा इशारा दिला असून, एमएनजीएलने आपल्या ग्राहकांना मोबाईल अँपद्वारे बिलाचे पैसे भरण्याची किंवा अपडेट करण्याची अशी कोणतीही सुविधा उपलब्ध करुन दिलेली नाही. त्यामुळे अशा फेक अथवा फ्रॉड कॉल्सवर विश्वास ठेवू नये, असे आवाहन एमएनजीएलचे बिलिंग विभागाचे प्रमुख आनंद जैन यांनी केले आहे.

एमएनजीएलकडे फेक कॉल्ससंदर्भात तक्रारी दाखल झाल्या आहेत. ग्राहकांना फोन करुन ‘मोबाईल लिंक डाऊनलोड करुन पैसे भरा. अन्यथा तुमचे गॅस कनेक्शन बंद करण्यात येईल,’ असे सांगितले जात आहे. यातून एमएनजीलची प्रतिमा मलिन होत आहे. त्यामुळे एमएनजीएलच्या व्यवस्थापनाने सदर बाब अतिशय गांभीर्याने दखल घेतली आहे. तसेच, एमएनजीएलनेही ग्राहकांना सूचित केले आहे.

त्यासोबतच, अशा फेक आणि फ्रॉड कॉल्स संदर्भात एमएनजीएलने १ एप्रिल २०२४ रोजी पुणे पोलिस आयुक्तांकडे तक्रार ही दाखल केली आहे. याशिवाय, एमएनजीएलने आपल्या ग्राहकांना याबाबत जागृत करण्यासाठी आपल्या ऑफिशियल ट्विटर आणि फेसबुक पेजवरुनही ग्राहकांना सूचित केले आहे. त्यासोबतच विविध वृत्तपत्रांमधून जाहीर नोटीस देऊन, रेडिओ जिंगल्सच्या माध्यमातून आणि ग्राहकांना एसएमएस तसेच व्हॉट्सअँपद्वारे संदेश पाठवून जनजागृती करत येत आहे. तसेच, असे प्रकार कोणत्याही ग्राहकासोबत घडत असल्यास, त्यांनी सदर बाब तातडीने पोलिसांच्या निदर्शनास आणून देण्याची विनंती केली आहे.

यासंदर्भात एमएनजीएलजे बिलिंग विभागाचे प्रमुख आनंद जैन यांनी सांगितले आहे की, “एमएनजीएलच्या सर्व ग्राहकांनी तोतयागिरी करुन एमएनजीएलच्या नावाने फसवे कॉल्स करणाऱ्या आणि गॅस बिल भरण्यासाठी काही अँप्स डाऊनलोड करण्यास किंवा लिंकद्वारे विचार करणाऱ्या फसव्या कॉल्सपासून सावध राहावे. एमएनजीएल केवळ देयकावर/बिलावर नमुद केलेल्या बिल प्रदान पद्धतीच्या माध्यमातून म्हणजेत http://www.mngl.in/pay-bill वरुन, भारत बिल पेमेंट सिस्टिम (बीबीपीएस), एनएसीएच, इसीएस, एक्सिस/आयसीआयसीआय बँकच्या शाखेमध्ये धनादेश आणि शिवाजीनगर किंवा चिंचवड येथील एमएनजीएल वॉक-इन सेंटर्समध्ये बिलाची रक्कम स्विकारली जाते. त्यामुळे अशा तोतयागिरीपासून ग्राहकांनी सावध राहावे.”