छोट्या पडद्यावरील प्रेक्षकांची लाडकी जोडी म्हणजे अभिनेता सुयश टिळक आणि अभिनेत्री सुरुची अडारकर. यापूर्वी ‘का रे दुरावा’ या मालिकेत ही जोडी बराच काळ एकत्र दिसली. त्यानंतर त्यांचं ‘स्ट्रॉबेरी’ हे नाटक आलं. सुयश आणि सुरुची यांच्यातला ‘दुरावा’ संपला आहे. प्रेक्षकांची ही आवडती जोडी पुन्हा एकदा एकत्र येतेय. झी युवा वरील ‘एक घर मंतरलेलं’ या नव्या मालिकेमध्ये हे दोघे दिसणार आहेत.
घराची ओढ प्रत्येकालाच असते, पण असंही एक घर असतं जे तुम्हालाचं ओढून घेतं…हे वाक्य जेवढं गूढ आहे तशीच ही मालिका सुद्धा आहे . काहीतरी अनपेक्षित गूढ आणि रहस्यमय अशी ही नवीन मालिका ‘एक घर मंतरलेलं’ ४ मार्चपासून सोमवार ते शनिवार रोज रात्री ९:३० वाजता झी युवा वाहिनीवरून प्रेक्षकांच्या भेटीस येणार आहे. या मालिकेत सुरुची एका न्यूज रिपोर्टरची भूमिका साकारणार असून सुयशच्या व्यक्तिरेखेबद्दल अजूनही गुप्तता बाळगण्यात आली आहे. पण सुयशची भूमिका देखील तितकीच दमदार आणि वेगळी असेल यात शंकाच नाही. तूर्तास ही जोडी प्रेक्षकांच्या भेटीस येतेय आणि या जोडीची ऑनस्क्रीन केमिस्ट्री प्रेक्षकांना पुन्हा एकदा अनुभवायला मिळणार आहे त्यामुळे प्रेक्षकांना या मालिकेचे वेध लागले असून ते या मालिकेची आतुरतेने वाट बघत आहेत. ही वेगळ्या धाटणीची मालिका आणि त्यातील सुरुची व सुयशची अनोखी भूमिका प्रेक्षकांना नक्कीच आवडेल यात शंकाच नाही.