शिरोळे घराणं भाजपशी अत्यंत प्रामाणिक – खासदार काकडे
पुणे : माजी खासदार अनिल शिरोळे, सिद्धार्थ शिरोळे हे अत्यंत संयमी व शांत स्वभावाचे असून शिरोळे घराणं भाजपशी अत्यंत प्रामाणिक आहे. पक्षाचा कोणताही निर्णय ते मान्य करतात. विद्यमान खासदार असताना अनिल शिरोळे यांनी तिकीट मिळाले नाही तरी त्याक्षणी गिरीश बापट यांची स्वतः भेट घेऊन शुभेच्छा दिल्या, असे मत भाजपाचे सहयोगी सदस्य व राज्यसभा खासदार संजय काकडे यांनी आज व्यक्त केले.
शिवाजीनगर विधानसभा मतदार संघातील भाजपचे उमेदवार सिद्धार्थ शिरोळे यांच्या प्रचारार्थ आयोजित करण्यात आलेल्या कार्यकर्ता मेळाव्यात खासदार संजय काकडे बोलत होते. याप्रसंगी माजी खासदार अनिल शिरोळे, खासदार गिरीश बापट, उमेदवार सिद्धार्थ शिरोळे, दत्ता खाडे, बंडु ढोरे आदी मान्यवर उपस्थित होते.
प्रत्येक विधानसभा मतदार संघाप्रमाणे शिवाजीनगर विधानसभा मतदार संघातून निवडणूक लढविण्यासाठी 31 जण इच्छुक होते. मात्र, उमेदवारी एकालाच मिळते आणि ती सिद्धार्थ शिरोळे यांना मिळाली आहे. आता इतर सर्वांनी शिरोळे यांच्या विजयासाठी काम करायचे आहे. मुख्यमंत्री देवेंद्र फडणवीस व पंतप्रधान नरेंद्र मोदी यांचे विकासाचे काम घराघरात पोहोचवायचे आहे. लोकसभा निवडणुकीपेक्षा या विधानसभा निवडणुकीत शिरोळे यांना जास्त मताधिक्य मिळेल आणि सुमारे 35 ते 40 हजार मतांनी ते विजयी होतील, असेही खासदार काकडे म्हणाले.
शिवाजीनगर विधानसभा मतदार संघ हा तसा आकाराने लहान आहे. त्यामुळे प्रत्येक मतदारापर्यंत पोहोचणे शक्य आहे. आणि मुख्यमंत्री देवेंद्र फडणवीस यांनी शिवाजीनगर विधानसभा मतदार संघाबाबत विशेष सूचना दिल्या असून त्यांचे सर्व गोष्टींकडे बारकाईने लक्ष असल्याने सर्वांनी एकत्रित येऊन काम करावे, असे आवाहनही खासदार संजय काकडे यांनी केले.