पुणे : ऐन विधानसभा निवड्णूकीच्या तोंडावर वडगावशेरी विधानसभा मतदारसंघात भारतीय जनता पक्षाने राष्ट्रवादीला धक्का दिला आहे. राष्ट्रवादी पक्षाच्या धानोरीच्या नगरसेविका रेखा टिंगरे यांचे पती चंद्रकांत टिंगरे आणि राष्ट्रवादीचे माजी नगरसेवक आणि पदाधिकारी ऍड भगवान जाधव यांनी कार्यकत्यांसह आमदार जगदिश मुळीक यांच्या उपस्थितीत शुक्रवारी भाजपमध्ये प्रवेश केला. यामुळे वड्गावशेरी विधानसभा मतदारसंघात भाजपला फायदा होण्याची शक्यता वर्तविली जात आहे. भाजपचे नगरसेवक अनिल उर्फ बॉबी टिंगरे यावेळी उपस्थित होते.
अवघ्या सहा महिन्यांपूर्वी झालेल्या लोकसभा निवड्णूकीत भारतीय जनता पक्षाकडे मतदारांचा कल वाढत असल्याचे मतदानाच्या आकडेवारीवरून समोर आले आहे.
त्यामुळे गेल्या काही महिन्यात या विधानसभा मतदारसंघातून मोठया प्रमाणात सर्वच राजकीय पक्षांचे कार्यकर्ते भाजपच्या वाटेवर आहेत. त्यात आता राष्ट्रवादीच्या नगरसेवकांच्या नातेवाईकांचीही भर पडू लागली असून गेल्या काही महिन्यात अनेक कार्यकर्त्यांनी भाजपची वाट धरली असल्याने मतदारसंघात राजकीय समिकरणे वेगाने बदलत असल्याचे चित्र आहे. त्यामुळे भाजप विरोधी पक्षांची चांगलीच कोंडी झाली असून ही गळती न थांबल्यास इतर राजकीय पक्षांना त्याचा फटका निवडणूकीत बसण्याची शक्यता नाकारता येत नाही.
दरम्यान, टिंगरे यांच्या पक्ष प्रवेशाचे आमदार तसेच विद्यमान उमेदवार जगदीश मुळीक यांनी स्वागत केले असून गेल्या पाच वर्षामध्ये भाजप पक्ष खुप वाढला आहे. या वडगावशेरी मतदार संघामध्ये सर्वाधिक ताकद ही भाजपची आहे. गेल्या दोन महिन्यामध्ये जवळपास सहा हजार कार्यकत्यांनी भाजपमध्ये प्रवेश केला आहे. तसेच या मतदार संघामध्ये हजार पेक्षा जास्त सभासद नोंदणी झाली आहे. मतदार संघामध्ये भाजपचे 14 नगरसेवक आहेत. शिवसेनाचे तीन नगरसेवक आहे. वडगावशेरी हा भाजप चा बालेकिल्ला बनला असल्याचे मत मुळीक यांनी या पक्ष प्रवेशाच्या कार्यक्रमावेळी केले आहे.