जवळपास १७ वर्षांपूर्वी एका म्युझिक व्हिडिओमुळे एक सुंदर मुलगी बरीच प्रसिद्ध झाली. या मुलीच नाव आहे शेफाली जरीवाला. जुन्या गाण्याचे रिमिक्स करून तयार करण्यात आलेले ‘कांटा लगा..’ हे गाणे त्यावेळी सर्वांच्याच आवडीचे झाले होते. डिस्कोपासून पार्ट्यांपर्यंत तसेच अगदी हळदी समारंभातही हे गाणं वाजवलं जायचं. या गाण्यामुळे शेफाली रातोरात प्रसिद्ध झाली आणि तिला लोक ‘कांटा लगा गर्ल’ म्हणून ओळखू लागले. सलमान खान, अक्षय कुमार आणि प्रियांका चोप्रा यांच्या ‘मुझसे शादी करोगी’ चित्रपटात आयटम साँग करताना दिसली. ‘बुगी वुगी’, ‘नच बलिये ५’ आणि ‘नच बलिये ७’ या रिअॅलिटी शोमध्येही ती झळकली होती.
हीच आता शेफाली बिग बॉसच्या माध्यमतातून लवकरच चाहत्यांच्या भेटीस येत आहे.
बिग बॉस हा छोट्या पडद्यावरील सर्वाधिक लोकप्रिय रिअॅलिटी शोंपैकी एक म्हणून ओळखला जातो. सध्या या शोचे १३ वे पर्व सुरु असुन यात शेफालीची वाईल्ड कार्ड एंट्री होणार आहे. खरं तर, २९ ऑक्टोंबरलाच तिने बिग बॉसच्या घरात प्रवेश केला. येत्या काही दिवसात तो भाग टीव्हीवर प्रदर्शित केला जाईल. दरम्यान या नव्या स्पर्धाकाला पाहण्यासाठी बिग बॉसचे प्रेक्षक प्रचंड उत्सुक आहेत.