पुणे-विधानसभा निवडणुकीसाठी पुण्यातील आठही मतदारसंघ भाजपाने स्वतःकडे राखल्याने व शिवसेनेच्या वाट्याला एकही जागा न आल्याने अपेक्षेप्रमाणे शिवसैनिकांनी बंडाचा झेंडा हाती घेतला आहे. खडकवासला व कसबा या दोन मतदारसंघातुन शिवसैनिकांनी भाजपाविरोधातच निवडणुकीच्या रिंगणात उडी घेतली आहे.
पुण्याच्या किमान एक किंवा दोन जागांसाठी शिवसेनेच्या पक्षश्रेष्ठींनी जोर लावयला हवा होता, अशी स्थानिक शिवसैनिकांची भावना होती. मात्र असे न झाल्याने शिवसैनिकांनी उघडपणे नाराजी देखील व्यक्त केली होती. या पार्श्वभूमीवरच आज (गुरूवार) शिवसेनेचे जिल्हाप्रमुख रमेशबापू कोंडे यांनी खडकवासला व नगरसेवक विशाल धनवडे यांनी कसबा मतदारसंघामधुन शक्तीप्रदर्शन करत उमेदवारी अर्ज दाखल केला आहे.
एकीकडे महायुती झालेली असताना आता या दोन मतदार संघासह पुण्यातील अन्य मतदारसंघातही भाजपाच्या उमेदवाराविरोधात स्थानिक नाराज शिवसैनिक नेमकी काय भूमिका घेतात हे पाहावे लागणार आहे.