यापुढे कोणत्याही बंदमध्ये व्यापारी दुकाने बंद ठेवणार नाहीत- पुणे जिल्हा रिटेल व्यापारी संघाचा निर्णय
पुणे-देशात सध्या आर्थिक मंदीचं वातावरण आहे. अगोदरच ऑनलाईन मार्केटमुळे अडचणीत आलेला व्यापारी मंदीमुळे तर, संकटात सापडला आहे. अशा परिस्थितीत कोणत्या ना कोणत्या राजकीय अथवा सामाजिक संघटनेच्या वतीनं बंद पुकारला जातो. आणि व्यापारी वर्गाला यामुळे मोठी आर्थिक झळ बसते. त्यामुळे यापुढे कोणत्याही पक्ष व संघटनांनी पुकारलेल्या बंदमध्ये व्यापारी सहभागी होणार नाही, असा निर्णय पुणे जिल्हा रिटेल व्यापारी संघातर्फे घेण्यात आला आहे. तसेच, बंद व इतर काळात व्यापाऱ्यांना भयमुक्त व्यापार व उद्योग करता यावा अशी कायदा व सुव्यवस्था राखण्यात यावी, अशी विनंती राज्यकर्ते व पोलीस प्रशासनाला आहे, असे पुणे जिल्हा रिटेल व्यापारी संघाचे अध्यक्ष सचिन निवंगुणे यांनी कळविले आहे.
राजकीय व सामाजिक संघटनांकडून पुकारला गेलेला बंद बरोबर आहे की चूक यामध्ये आम्हा व्यापारी वर्गाला पडायचं नाही. आमच्या भावना या बंद पुकारणाऱ्यांसोबत निश्चित असतील. परंतु, त्यासाठी दुकाने व व्यवसाय बंद ठेवण्याची सक्ती त्यांनी करु नये ही अपेक्षा आहे.
आणि म्हणूनच पुणे जिल्हा रिटेल व्यापारी संघातर्फे हा निर्णय घेण्यात येत आहे की, यापुढे कोणत्याही बंदमध्ये व्यापारी वर्ग त्यांची दुकाने बंद ठेवणार नाहीत. पोलिसांनी यासंदर्भात व्यापाऱ्यांना संरक्षण द्यावे. व्यापारी हा दैनंदिन जीवनात आवश्यक असलेल्या जीवनावश्यक वस्तूंचा व्यापार करतो. त्यामुळे दुकाने बंद ठेवून सामान्य नागरिकांना वेठीस धरण्याचे काम यापुढे व्यापारी करणार नाही.
व्यापाऱ्यांवर हल्ले होण्याचे प्रमाण वाढले आहे. वर्गणी, खंडणी, बंद याच कारणांमुळे व्यापाऱ्यांवर हल्ले होत आहेत. याची गंभीर दखल राज्यकर्ते आणि पोलीस प्रशासनाने घ्यावी, अशीही विनंती यानिमित्ताने करीत आहे.