‘होम क्वारंटाइन’ करण्यात येणाऱ्या नागरिकांच्या हातावर शिक्का मारून त्यांना सक्तीने १४ दिवस घरात बसण्याच्या सूचना प्रशासनाकडून देण्यात येत आहेत. मात्र, तरीही अनेक नागरिक ‘होम क्वारंटाइन’च्या काळात बाहेर फिरत असल्याचे किंवा घरात बसून राहत नसल्याचे निदर्शनास आले आहे. त्यामुळे प्रशासनाने ‘म्हाडा’च्या रिकाम्या असलेल्या इमारती ताब्यात घेऊन, त्या ठिकाणी शहराबाहेरून येणाऱ्या नागरिकांना सक्तीने ‘होम क्वारंटाइन’ करण्याचा निर्णय घेतला आहे.
‘म्हाडा’च्या पुणे विभागाने चाकण रस्त्यावरील म्हाळुंगे येथे इमारती बांधल्या आहेत. सध्या त्या इमारती रिकाम्या आहेत. त्या इमारतींमध्ये संबंधित नागरिकांची ‘होम क्वारंटाइन’ची व्यवस्था केली जाणार आहे. त्या इमारती जिल्हा प्रशासनाने ताब्यात घेतल्या असून, त्या ठिकाणी अत्यावश्यक सुविधा उपलब्ध केल्या आहेत.
चाकण रस्त्यावरील म्हाळुंगे येथे असलेल्या मोकळ्या इमारतींमध्ये ‘होम क्वारंटाइन’ करण्यात येणाऱ्या नागरिकांची व्यवस्था केली जाणार आहे. या इमारतींमध्ये ३७६ फ्लॅट आहेत. ‘होम क्वारंटाइन’ केलेल्या नागरिकांमध्ये ‘करोना’ची लक्षणे आढळल्यास त्यांना रुग्णालयांत उपचारासाठी दाखल करण्यात येणार आहे. – अशोक पाटील, मुख्य अधिकारी, म्हाडा, पुणे