अवकाश पर्यटनासाठी आनंद बनसोडे यांच्या 360 एक्सप्लोररचा रशियन कंपनीशी करार
एव्हरेस्टवीर आनंद बनसोडे यांनी अवकाश पर्यटनासाठी “360 स्पेस-ए” कंपनीची सुरवात केली.
रशियन स्पेस टूर कंपनीच्या एकतरीना झोनतोवा यांच्यासोबत झाल्या करारावर स्वाक्षरी.
मॉस्को(रशिया) : गिर्यारोहक व उद्योजक असलेले व पुणे विद्यापीठात फिजिक्स विषयात पी.एच.डी. करणारे संशोधक एव्हरेस्टवीर आनंद बनसोडे यांच्या 360 एक्सप्लोरर कंपनीसोबत रशियन स्पेस टूर कंपनीने करार केला असून असा करार करणारी भारतातील एकमेव कंपनी ठरली आहे. आनंद बनसोडे यांनी “360 स्पेस-ए” असे नवीन व्हेंचरला नाव दिले असून लवकरच व्हेंचरमार्फत अवकाशात जाण्यासाठी लागणारे ट्रेनिंग, मिग विमान व पॅराशूट प्रशिक्षण, झिरो ग्राव्हिटी फ्लाईट, आंतरराष्ट्रीय अवकाश स्थानकावरील (ISS) प्रशिक्षण व प्रत्यक्ष अवकाशसफरी बद्दल सर्व नियोजन केले जाणार आहे.
हे सर्व प्रशिक्षण स्टार सिटी स्पेस सेंटर व बैकानूर येथील स्थानकावर होणार असून याच ठिकाणाहून भारताचे प्रथम अवकाशयात्री राकेश शर्मा यांनी अवकाशात उड्डाण केले होते.
2001 मध्ये डेनिस टिटो यांनी प्रथम पर्यटक म्हणून अवकाशस्थानकाला भेट दिली होती. यानंतर बऱ्याच लोकांनी पर्यटक म्हणून अवकाशस्थानकाची सैर केली आहे. अवकाश प्रवास कित्येकांचे स्वप्न असते आणि ते तेव्हढेच खर्चिकही आहे. येणारया काळात अवकाशात बऱ्याच संधी उपलब्ध आहेत आणि त्यासाठी एलोन मस्क, रिचर्ड ब्रँसन यांच्यासारखे उद्योजक मोठी कामगिरी करत आहेत.
गेले जवळपास 6 महिने चर्चा व ऑनलाईन मिटिंग झाल्यानंतर आज मॉस्को येथील भेटीत रशियन स्पेस टूर च्या एकतरीना झोनतोवा व आनंद बनसोडे यांनी करारावर स्वाक्षरी केल्या. आनंद बनसोडे यांच्या “360 स्पेस-ए” च्या लोगोचेही अनावरण एकतरीना झोनतोवा यांच्याहस्ते करण्यात आले. एखाद्या छोट्या युवा उद्योजकाने एव्हड्या मोठ्या स्तरावर कामगिरी करण्याची ही पहिलीच वेळ असून संपूर्ण महाराष्ट्र व भारतासाठी ही अभिमानाची गोष्ट आहे. लहानपणापासून अवकाशाची आवड असणारे आनंद बनसोडे यांनी आतापर्यंत 4 खंडातील 4 सर्वोच्च शिखरे सर केली आहेत. याशिवाय 5 पुस्तकेही लिहिली आहेत व अनेक विक्रम त्यांच्या नावे आहेत.
—————————-
“भविष्यात अवकाश या विषयात खूप मोठे बदल होणार आहेत. या क्षेत्रात खूप मोठी संधी असून हा करार म्हणजे माझ्या लहानपणीचे स्वप्न पूर्ण करण्यासाठी एक छोटेसे पाऊल आहे. भारत, सिंगापूर, मलेशिया, दुबई, अमेरिका यादेशातील लोकांसाठी हे टूर आयोजित करण्याचा करार रशियन स्पेस टूर कंपनीशी झाला असून 9 सप्टेंबरपासून प्रत्यक्ष कामास सुरवात केली जाणार आहे. यामार्फ़त माझे व शेकडो लोकांचे अवकाशाचे स्वप्न पूर्ण होणार आहे. या करारामुळे आत्मविश्वास वाढला असून स्वप्नांच्या मार्गावर विश्वास ठेवला तर कोणतेही स्वप्न पूर्ण होऊ शकते.’
आनंद बनसोडे
(संशोधक, युवा उद्योजक, गिर्यारोहक)