पुणे- राज्यात आणि केंद्रात भाजप सरकार बहुमताने राज्य करीत असल्याने पुण्याचे पोलीस हे गेली २ ते अडीच वर्षांपासून पालकमंत्री गिरीश बापटांच्या दबावाखाली काम करत असून त्यांच्याच इशाऱ्यावर ते विरोधी पक्षांमधील मातब्बर नेत्यांवर गुन्हे दाखल करून त्यांना जेरीस कसे आणता येईल अशा दृष्टीने राबत असल्याचा घणाघाती आरोप कॉंग्रेसचे नगरसेवक रवी धंगेकर यांनी केला आहे. राष्ट्रवादी आणि कॉंग्रेस मधील शक्तिशाली नेत्यांना बापट हे पोलिसी बळाचा अतिरेकी वापर करून संपविण्याचा प्रयत्न करत आहेत आणि त्यात बहुतेक मराठा व दलित समाजाच्या नेत्यांचा समावेश असल्याचे त्यांचे म्हणणे आहे. धंगेकर हे मनसे तून कॉंग्रेस मध्ये आलेले आहेत तत्पूर्वी त्यांना भाजपमध्ये आणण्याचे प्रयत्न झाले होते . धंगेकर यांनी अतिरिक्त आयुक्तांवर चप्पल फेकल्या प्रकरणी त्यांच्यावर यापूर्वीच गुन्हा दाखल झालेला आहे .
अलीकडे धंगेकर यांनी ‘महापालिका सेवकास मारहाण केल्याची तक्रार पोलिसात दाखल झाली आहे ,हि तक्रार खोटी असून, महापालिकेतील ‘सीसीटीव्ही’मध्ये घडलेला हा सर्व प्रकार उघडकीस आला आहे. त्या ‘सीसीटीव्ही’मध्ये मी कुठेही सेवकाला मारहाण केली नसल्याचे स्पष्ट दिसते आहे. मात्र, पालकमंत्री गिरीश बापट यांच्या दबावातून माझ्यावर खोटे गुन्हे दाखल करण्यात येत आहेत,’ असा आरोप नगरसेवक रवींद्र धंगेकर यांनी केला आहे.
शिवाजीनगर पोलिस ठाण्यात महापालिका सेवक साईनाथ थोरात यांना मारहाण केल्याप्रकरणी धंगेकर यांच्यासह दोघांवर नुकताच अदखलपात्र गुन्हा दाखल करण्यात आला आहे. धंगेकर यांनी पालिकेतील ‘सीसीटीव्ही’ फुटेज मिळवत घटलेल्या घटनेची माहिती दिली. त्यांनी केलेल्या दाव्यानुसार थोरात यांना मारहाण झाली त्या वेळी त्यांनी काहीही केलेले नाही. धंगेकर यांच्यासमवेत असलेला कार्यकर्ता आणि थोरात यांच्यात बाचाबाचीचा प्रकार घडला. धंगेकर यांनी तो वाद सोडविण्याचा प्रयत्नही केला. हे सर्व ‘सीसीटीव्ही’ फुटेजमध्ये स्पष्ट दिसत असून, बापट यांच्याकडून खोटे गुन्हे दाखल करण्यासाठी दबाब आणण्यात येत असल्याचा आरोप धंगेकर यांनी केला.