कांबळे व कार्यकर्त्यांचे खासदार काकडेंकडून अभिनंदन
पुणे, दि. 12 ऑक्टोबर : पुणे महापालिकेच्या प्रभाग क्रमांक 21 च्या पोटनिवडणुकीत भाजप-आरपीआयच्या उमेदवार हिमाली नवनाथ कांबळे यांचा साडे चार हजार ते पाच हजार मताधिक्याने आज दणदणीत विजय झाला आणि भाजपाचे सहयोगी सदस्य व राज्यसभेचे खासदार संजय काकडे यांनी वर्तविलेला अंदाज खरा ठरला. त्यामुळे पुन्हा एकदा खासदार काकडे आणि त्यांच्या राजकीय अभ्यासाचे गणित समोर आले.
सामाजिक न्याय राज्यमंत्री दिलीप कांबळे यांच्यातर्फे नुकत्याच पुणे कॅन्टोन्मेंट बोर्डात आयोजित केलेल्या कार्यक्रमात भाजपचे प्रदेशाध्यक्ष रावसाहेब दानवे यांच्या प्रमुख उपस्थितीत खासदार काकडे यांनी हा अंदाज वर्तविला होता. यावेळी खासदार अनिल शिरोळे व शहराध्यक्ष योगेश गोगावले आदींची उपस्थिती होती.
पोटनिवडणूक बिनविरोध व्हावी यासाठी खासदार काकडे यांनी राष्ट्रवादी काँग्रेसचे शहराध्यक्ष व इतर पदाधिकाऱ्यांना विनंती केली होती. परंतु, त्यास सकारात्मक प्रतिसाद मिळाला नाही. निवडणूक कमळ चिन्हावर होत असल्याचे कारण देत राष्ट्रवादी काँग्रेसकडून उमेदवार उभा करण्यात आला. खासदार काकडे यांनी सुरुवातीपासूनच हिमाली कांबळे यांच्या विजयासाठी नियोजन केले होते. त्यास चांगलेच यश आले.
जीएसटीमुळे व्यापार व उद्योग क्षेत्र त्रस्त असल्याचा व पेट्रोलच्या भावामुळे महागाई वाढल्याचा विरोधकांनी प्रचार केला. परंतु, मतदारांनी या मुद्द्यांना बगल देत पंतप्रधान नरेंद्र मोदी व मुख्यमंत्री देवेंद्र फडणवीस यांच्या विकासाभिमुख नेतृत्वावर विश्वास ठेवून मतदान केले. हेच यातून स्पष्ट होते, असे खासदार संजय काकडे यांनी सांगितले. तसेच, विजयी उमेदवार हिमाली कांबळे व त्यांच्या विजयासाठी काम करणाऱ्या पदाधिकारी व कार्यकर्त्यांचे त्यांनी अभिनंदन केले.
दिवंगत उपमहापौर नवनाथ कांबळे यांच्या निधनाने रिक्त झालेल्या या जागेसाठी ही निवडणूक झाली. राष्ट्रवादीच्या धनंजय गायकवाड यांच्यावर हिमाली कांबळे यांनी 4 हजार 583 मतांनी मात केली. हिमाली कांबळे यांना 7 हजार 899 आणि राष्ट्रवादी काँग्रेसचे उमेदवार धनंजय गायकवाड यांना 3 हजार 316 मतं मिळाली.