पंढरपूर-देशातील वर्तमानपत्रे आणि वृत्तवाहिन्या भाजप आणि पंतप्रधान मोदींनी विकत घेतली असून भाजपची बाजू रंगवून दाखविण्याचे काम सध्या सुरू आहे. त्यामुळे नेमकं सत्य काय हे समाजासमोर येऊ दिले जात नसल्याचा खळबळजनक आरोप काँग्रेसचे ज्येष्ठ नेते सुशिलकुमार शिंदे यांची मुलगी काँग्रेस पक्षाच्या आमदार प्रणिती शिंदे यांनी केला आहे.
काँग्रेसचे ज्येष्ठ नेते सुशीलकुमार शिंदे यांच्या प्रचारार्थ सोलापूर लोकसभा मतदार संघातील कांसेगाव येथे काँग्रेसतर्फे घेण्यात आली. प्रणिती शिंदे देखील आपल्या वडिलांच्या प्रचारासाठी आल्या होत्या.
या सभेत प्रणिती यांनी माध्यमांना लक्ष्य केले. भाजपकडून माध्यमांना पैसे दिले जातात आणि खोट्या गोष्टी किती छान आहेत हे पटवून दिले जाते. सत्य काय हे दडविले जाते ते लोकापर्यंत येऊ दिले जात नाही. त्यांच्या या नितीमुळे मतदारांमध्ये आणि खास करुन तरुणांमध्ये संभ्रम निर्माण होत असल्याचा गंभीर आरोप प्रणिती यांनी जाहीर सभेत केला.