नगर: क्रांतिकारी शेतकरी पक्षाचे राष्ट्रवादी काँग्रेस पुरस्कृत नेवासाचे आमदार शंकरराव गडाख आणि त्यांचे बंधू प्रशांत गडाख उद्या मंगळवारी शिवसेनेत प्रवेश करणार आहेत. शिवसेनेचे सचिव मिलिंद नार्वेकर यांच्याशी झालेली भेट आणि शिवसेना पक्षप्रमुख उद्धव ठाकरे यांच्याशी झालेल्या चर्चेनंतर गडाख यांनी शिवसेनेत प्रवेश करण्याचा निर्णय घेतला आहे. राष्ट्रवादीसाठी हा मोठा धक्का असल्याचं मानलं जात आहे.शिवसेना सचिव मिलिंद नार्वेकर यांनी आज नगरला जाऊन आमदार शंकरराव गडाख यांच्याशी चर्चा केली. त्यानंतर नार्वेकर यांनी क्रांतिकारी शेतकरी पक्षाचे ज्येष्ठ नेते यशवंतराव गडाख आणि उद्धव ठाकरे यांचे फोनवरून संभाषण घडवून आणलं. उद्धव ठाकरे यांनी गडाख यांना पाडव्याच्या शुभेच्छा देतानाच त्यांना शिवसेनेत येण्याची ऑफर दिली. यावेळी नेवासाचे आमदार शंकरराव गडाख आणि प्रशांत गडाखही उपस्थित होते. उद्धव ठाकरे यांच्याशी झालेल्या संभाषणानंतर गडाख यांनी शिवसेनेत जाण्याचा निर्णय घेतल्याचं सांगण्यात येतं. शिवसेनेत प्रवेश करण्यासाठी शंकरराव गडाख आणि त्यांचे बंधू प्रशांत गडाख मुंबईकडे रवाना झाल्याचंही सूत्रांनी सांगितलं.गडाख यांनी शिवसेनेला पाठिंबा देणारं पत्रही नार्वेकर यांना दिल्याचं सूत्रांनी सांगितलं. नगर जिल्ह्यात शिवसेनेचा एकही आमदार निवडून आलेला नाही. त्यामुळे गडाख यांच्या रुपाने ती उणीव भरून काढण्याचा शिवसेनेचा प्रयत्न असल्याचं सूत्रांनी सांगितलं.
दरम्यान, शंकरराव गडाख यांनी नेवासामधून क्रांतिकारी शेतकरी पक्षातर्फे निवडणूक लढवली होती. ही निवडणूक लढवताना त्यांनी भविष्यात गरज पडल्यास सत्ताधाऱ्यांना साथ देणार असल्याचं गडाख यांनी जाहीर केलं होतं. त्यानंतर राष्ट्रवादीने त्यांना पुरस्कृत उमेदवार म्हणून पाठिंबाही दिला होता. राष्ट्रवादीच्या कार्यकर्त्यांनी गडाख यांच्यासाठी प्रचारही केला होता. मात्र निवडणूक निकालानंतर राष्ट्रवादीसोबत जाण्याऐवजी गडाख यांनी वेगळा निर्णय घेतल्याने राष्ट्रवादीसाठी हा सर्वात मोठा धक्का असल्याचं मानलं जात आहे