मुंबई -राष्ट्रवादी काँग्रेसच्या वतीने दि.१४ व १५ सप्टेंबर रोजी आयोजित केलेल्या जेलभरो आंदोलनात राष्ट्रवादी महिला काँग्रेसच्या कार्यकर्त्या रस्त्यावर उतरुन आंदोलनात सहभागी होणार असल्याची माहिती पक्षाच्या राष्ट्रीय महिला अध्यक्षा फौजिया खान यांनी पत्रकार परिषदेत दिली. आपण पक्षाच्या सगळ्या महिलांना एकत्र घेऊन काम करणार आहोत. लवकच महिला पदाधिकाऱ्यांची विभागीय, जिल्हा कार्यकारिणी जाहीर करण्यात येईल, असेही फौजिया खान यांनी यावेळी सांगितले.
तसेच ७ सप्टेंबर ते १३ सप्टेंबर रोजी पक्षसंघटना वाढीसाठी विदर्भातील नागपूर, भंडारा, गोंदीया, गडचिरोली, वर्धा, चंद्रपूर, अमरावती, यवतमाळ, वाशिम, अकोला आणि बुलडाणा जिल्हयाचा दौरा चित्रा वाघ करणार असल्याचे त्यांनी सांगितले.
तेल, डाळ, धान्य यांचे भाव गगनाला भिडत आहेत. आघाडी सरकार असताना अन्न सुरक्षेच्या माध्यमातून रेशन दुकानांवर अन्न-धान्य दिले जात होते. पण आता नव्या सरकारने ते सुद्धा बंद पाडले. तेल, डाळ रेशन दुकानावर पुन्हा एकदा मिळालेच पाहिजे, यासाठी आम्ही सरकारविरोधात आंदोलन करणार असल्याची माहिती फौजिया खान आणि चित्रा वाघ यांनी दिली.