तिरुपती – जगातील सर्वात श्रीमंत देवस्थान असणाऱ्या तिरुपती बालाजीला भक्तांकडून दरवर्षी सोने, चांदी, हिरे आणि पैशांमध्ये कोट्यावधींचे दान केले जाते. आता त्यात आणखी एका भक्ताने भर घातली आहे. तामिळनाडूचा असलेल्या या भक्ताने चक्क सोन्याचे दोन हात बालाजीला समर्पित केले आहेत. या भक्ताचे नाव थंगा दुराई असून ते एक व्यापारी आहेत. ‘अभय हस्तम’ आणि ‘काति हस्तम’ असे नाव असणाऱ्या या हातांचे वजन प्रत्येकी सहा किलो आहे. सोन्याच्या हातांची किंमत तब्बल 2.25 कोटी रुपये सांगितली जात आहे. तिरुमाला तिरुपती देवदर्शनम (टीटीडी) ने सांगितले की, या हातांना शनिवारी सकाळी पूजा करताना अर्पण केले गेले.
लहानपणी झाला होता दुर्धर आजार, देवाने बरे केले…
तामिळनाडूच्या थेनी जिल्ह्यातील व्यापारी थंगा दुराई यांनी हे दान अर्पण केले आहे. त्यांनी पत्रकारांशी बोलताना सांगितले की, ते वेंकटेश देवांना लहानपणापासून आपले दैवत मानतात. लहान असताना त्यांना एका आजाराने ग्रासले होते. त्यामुळे त्यांची वाचण्याची शक्यता कमी होती. पण तिरूपतीला प्रार्थना केल्यानंतर त्यांचा आजार पूर्णपणे बरा झाला. त्यामुळे थंगा यांनी बालाजीला सोन्याचे हात दान करण्याचा निर्णय घेतला.