मुंबई : पत्रकारांविषयी आक्षेपार्ह आणि शिवराळ भाषा वापरणाऱ्या, विशेषत: पीटीआयचे प्रतिनिधी जस्टिन राव यांना अपमानित करून वृत्त माध्यमांना लाखोल्या वाहणाऱ्या अभिनेत्री कंगना राणावतचा मुंबई मराठी पत्रकार संघाने आज निषेध केला.
दि. 7 जुलै 2019 रोजी एका हिंदी चित्रपटाच्या गीत प्रदर्शन प्रसंगी जस्टिन राव यांनी प्रश्न विचारण्यास सुरुवात करताच कंगना राणावत हिने त्यांच्या विरोधात आक्षेपार्ह भाषा वापरण्यास सुरुवात केली. राव हे शांत होते. पण तरीही सदर कार्यक्रम आयोजित करणाऱ्या आयोजकांनी मायक्रोफोन काढून घेत त्यांना व इतर पत्रकारांना बाऊंसर्सद्वारे धक्काबुक्की केली. या घटनेनंतर राणावत हीची बहीण रंगोली चांडेल हीनेदेखील ट्वीटरद्वारे पत्रकारांवर आगपाखड केली. `नालायक’, `नंगे’, `सस्ते’ आणि `बिकाऊ’ अशा शब्दात रंगोली हीने आपल्या `सभ्यते’चे आणि `संस्कृति’चे प्रदर्शन केले. या दोघींची ही वर्तणुक आक्षेपार्ह, संतापजनक आणि निंदनीय असून त्यांच्याविरूद्ध कडक कारवाई करण्यात यावी, अशी मागणी पत्रकार संघाचे अध्यक्ष श्री. नरेंद्र वि. वाबळे यांनी केली आहे. यासंदर्भात `द एंटरटेंनमेंट जर्नलिस्ट गिल्ड’ने उपस्थित केलेल्या मुद्यांना पत्रकार संघाचा पाठिंबा असून `गिल्ड’ने केलेल्या मागणीनुसार राणावतने जस्टिन राव यांची व इतर पत्रकारांची त्वरित माफी मागावी, असेही श्री. वाबळे यांनी पत्रकात म्हटले आहे.