मुंबई- मुख्यमंत्री देवेंद्र फडणवीस व बिल्डर यांच्यात साटलोट असून नवी मुंबईतील सिडकोच्या जमीनसंबंधी मोठा घोटाळा झाल्याचा खळबळजनक आरोप काँग्रेसने केला आहे. सिडकोतील 1467 कोटी रुपयांची 24 एकर जमिन केवळ 3 कोटी रुपयांत बिल्डर मनिष भतिजा आणि संजय भालेराव यांना विकण्यात आली, असा आरोप मुंबईमध्ये काँग्रेसने पत्रकार परिषदेत केला. या पत्रकार परिषदेत मुंबई काँग्रेसचे अध्यक्ष संजय निरूपम, माजी मुख्यमंत्री पृथ्वीराज चव्हाण व काँग्रेसचे राष्ट्रीय प्रवक्ते रणजीत सुरजेवाला यांनी माहिती दिली.सिडकोची तब्बल 1767 कोटी रुपयांची जमीन 3.60 कोटी रुपयांच्या कवडीमोल दरात बिल्डरला देण्यात आली. मुख्यमंत्र्यांच्या अखत्यारीत असलेल्या शहरी विकास विभागाच्या परवानगीशिवाय हा व्यवहार होऊ शकत नाही, असा गंभीर आरोप मुख्यमंत्र्यांवर करण्यात आला आहे.
कोयना धरणाच्या 8 प्रकल्पग्रस्तांना देण्यात आलेली जमीन 15 लाख प्रति एकर दराने बिल्डरला विकण्यात आली. मंत्रालयातील मोठ्या अधिका-यांचा यात सहभाग असल्याचा आरोप मुंबई काँग्रेसचे अध्यक्ष संजय निरूपम यांनी केला आहे. तसेच संबंधित बिल्डर हे नुकतेच विधानपरिषदेत निवडून गेलेले आमदार प्रसाद लाड यांचे निकटवर्तीय असल्याचाही आरोप त्यांनी केला आहे.काँग्रेसचे राष्ट्रीय प्रवक्ते रणदीप सुरजेवाला यांनी, ‘महाराष्ट्राला क्लिन चिट मुख्यमंत्री लाभले आहेत. ते आपल्या मंत्र्यांना ताबडतोब क्लिन चिट देतात’, अशी टीका केली आहे.
सगळे कायदे धाब्यावर बसवत नावांमध्ये बदल करणे, पॉवर ऑफ अॅटर्नी देणं, सर्वे या सगळ्या गोष्टी एका दिवसांत म्हणजेच अवघ्या २४ तासांमध्ये उरकण्यात आल्या. सिडको अथवा कुठल्याही सरकारी यंत्रणेने विरोध तर केलाच नाही उलट बेकायदेशीर कृत्य करण्यात सहाय्य केल्याचा आरोप काँग्रेसने केला आहे. या सगळ्या प्रकरणाची न्यायालयीन चौकशी व्हावी अशी मागणी काँग्रेसचे नेते पृथ्वीराज चव्हाण, रणजीत सुरजेवाला व संजय निरुपम यांनी केला आहे.हा मोठा भ्रष्टाचार असून या प्रकरणाची खुली चौकशी व्हावी तसेच हा व्यवहार रद्द करण्यात यावा अशी मागणी पृथ्वीराज चव्हाण यांनी केली आहे.