नागपूर, दि. 17 : माध्यमिक शाळांमध्ये डोंगराळ भागासह सर्व शाळांना सद्यस्थितीत संच मान्यतेमध्ये किमान 20 विद्यार्थ्यांमागे एक शिक्षक मंजूर करण्यात येत असल्याची माहिती शालेय शिक्षण मंत्री विनोद तावडे यांनी आज विधानपरिषदेत दिली.
सदस्य दत्तात्रय सावंत यांनी याबाबत लक्षवेधी सूचना मांडली होती. त्याला उत्तर देताना श्री. तावडे म्हणाले, बालकांचा मोफत व सक्तीच्या शिक्षणाचा अधिकार अधिनियम, 2009 दि. 1 एप्रिल, 2010 पासून लागू झाला आहे. प्राथमिक शाळा व उच्च प्राथमिक शाळांमध्ये किती विद्यार्थ्यांसाठी किती शिक्षक असावेत (विद्यार्थी : शिक्षक गुणोत्तर पीटीआर) याबाबत अधिनियमाच्या कलम 25 मध्ये तरतूद आहे. त्या अनुषंगाने विद्यार्थी संख्येवर आधारित शिक्षक निश्चिती करण्याच्या सूचना, शासन निर्णय दि. 13 डिसेंबर, 2013 व दि. 28 ऑगस्ट 2015 अन्वये निर्गमित करण्यात आले आहेत. तसेच या शासन निर्णयांद्वारे शिक्षक संख्या निश्चितीबाबतचे यापूर्वीचे सर्व शासन निर्णय अधिक्रमित करण्यात आले आहेत.
सदस्य बाळाराम पाटील यांनी याबाबत झालेल्या चर्चेत सहभाग घेतला.